У сувязі з пандэміяй каранавірусу біскуп Гродзенскі Аляксандр Кашкевіч выдаў спецыяльнае паведамленне адносна сёлетніх цэлебрацый набажэнстваў Вялікага тыдня.

У сувязі з пандэміяй каранавірусу, якая працягваецца ў свеце, Кангрэгацыя па справах Божага культу і дысцыпліны сакрамэнтаў 17 лютага выдала Ноту, якая пакідае ў сіле распараджэнні і рэкамендацыі, змешчаныя ў Дэкрэце гэтай Кангрэгацыі ад 25 сакавіка 2020 г., якія датычаць цэлебрацый Пальмовай нядзелі і Пасхальнага трыдууму.

У кантэксце актуальнай эпідэмічнай сітуацыі ў Рэспубліцы Беларусь, у клопаце пра духоўнае і фізічнае здароўе вернікаў, беручы пад увагу вышэйзгаданыя дакументы Апостальскай Сталіцы, як і ўлічваючы адсутнасць заканадаўчых абмежаванняў адносна супольнага прабывання асобаў і іх перамяшчэння, пастанаўляю захоўваць таксама ў бягучым годзе мінулагоднія распараджэнні і рэкамендацыі, якія датычаць цэлебрацый Пальмовай нядзелі і Пасхальнага трыдууму.

У сувязі з гэтым:

1. Набажэнства Пальмовай нядзелі, якое нагадвае пра ўрачысты ўезд Езуса ў Ерузалем, належыць цэлебраваць паводле другой або трэцяй формы Рымскага Імшалу, выключаючы ўрачысты працэсійны ўваход.

2. Імша Хрызма ў Вялікі чацвер 1 красавіка 2021 г. у 10.00 будзе цэлебравацца, як звычайна, у гродзенскай катэдры з удзелам ксяндзоў дэканаў і святароў, якія пажадаюць у ёй удзельнічаць. Сустрэча святароў у курыі пасля заканчэння Імшы не плануецца.

3. Імшу Вячэры Пана належыць цэлебраваць паводле звычайнага парадку, выключаючы абрад абмывання ног.

4. Літургію Мукі Пана ў Вялікую пятніцу належыць цэлебраваць паводле звычайнага парадку з наступнымі зменамі:

 у агульнай малітве пасля дзявятага (перадапошняга) закліку трэба дадаць інтэнцыю аб спыненні эпідэміі (тэкст у дадатку);

 акт адарацыі Крыжа праз уцалаванне здзяйсняе толькі цэлебрант. Іншыя ўдзельнікі набажэнства адаруюць Крыж супольна праз укленчванне або глыбокі паклон. Таксама пасля заканчэння набажэнства Крыж не адаруюць індывідуальна праз уцалаванне. Крыж належыць устанавіць у адпаведна падрыхтаваным месцы для супольнай адарацыі.

5. Благаслаўленне страваў на велікодны стол належыць здзяйсняць паводле звычайнага парадку. Ваду для благаслаўлення вярнікі могуць прынесці з сабой ва ўласных начыннях. Не належыць захоўваць у касцёле ў адным начынні ваду для раздавання вернікам.

6. Пасхальную вігілію належыць цэлебраваць паводле звычайнага парадку. У залежнасці ад канкрэтнай сітуацыі, паводле разважлівага меркавання пробашча, можна выключыць абрад благаслаўлення агню і працэсію з пасхалам. У такім выпадку належыць распачаць літургію з запальвання пасхала ля алтара і спеву велікоднага паслання Exultet (у карацейшай версіі). Літургію хросту належыць абмежаваць абрадам аднаўлення абяцанняў хросту.

7. Рэзурэкцыйная працэсія можа адбыцца паводле мясцовага звычаю (пасля Імшы Пасхальнай вігіліі, дзе існуе такая практыка, або перад ранішняй Імшой у Нядзелю Уваскрасення Пана). Паводле разважлівага меркавання пробашча, рэзурэкцыйную працэсію можна не праводзіць. Дзе існуе такі звычай, перад Імшой у велікодную раніцу можа адбыцца начная эўхарыстычная адарацыя.

8. Падчас цэлебрацыі ўсіх набажэнстваў належыць захоўваць умеркаванасць і разважлівасць, пазбягаючы празмернага падаўжэння часу правядзення літургіі.

Шаноўным святарам, кансэкраваным асобам і вернікам жадаю Божага благаслаўлення і вытрымкі ў гэты час асаблівага выпрабавання, каб мы ўсе – нягледзячы на эпідэмію каранавірусу – маглі добра падрыхтавацца і годна адзначыць як Пальмовую нядзелю, так і Пасхальны трыдуум.

З пастырскім благаслаўленнем

Aляксандр Кашкевіч

Біскуп Гродзенскі

Гродна, 22.03.2021

№ 46/21

Тэкст для друку інтэнцыі аб спыненні эпідэміі