Курыя Гродзенская дыяцэзіі са смуткам паведамляе, што 15 лютага ў Варшаве (Польша) адышоў па ўзнагароду да Пана а. Казімір Жыліс SJ.
На працягу многіх гадоў, з 6 кастрычніка 1983 года, айцец Казімір Жыліс нёс святарскае служэнне ў Гродзенскай дыяцэзіі.
Каталіцкі Касцёл у Беларусі ўдзячны яму за аднаўленне касцёлаў, вельмі багаты кінаархіў адраджэння Касцёла, шматлікія пакліканні, сярод якіх сённяшні дапаможны біскуп і Генеральны вікарый Гродзенскай дыяцэзіі Юзаф Станеўскі.
Таксама айцец Жыліс шмат гадоў быў пробашчам парафіі Найсвяцейшай Тройцы ў Індуры (дэканат Гродна-Захад) і служыў у гродзенскім катэдральным касцёле св. Францішка Ксаверыя.
Асоба а. Казімiра Жыліса добра вядомая ў гродзенскай турме, дзе ён шмат гадоў рэалізоўваў словы Хрыста: “Я быў у вязніцы, а вы адведалі Мяне”. Наведваючы гродзенскую турму, ён удзяляў святыя сакрамэнты, праводзіў размовы, а найперш слухаў тых, якія ўчынілі злачынства, але мелі ў сабе прагненне змяніць жыццё.
Апрача гродзенскай турмы, а. Казімір наведваў навагрудскі лячэбна-працоўны прафілакторый і папраўчую калонію ў Ваўкавыску. Ён стаў адным з першых святароў у Беларусі, які распачаў пастырства вязняў, што вельмі важна для іх вяртанння да нармальнага жыцця.
Айцец Казімір Жыліс вядомы і ў літоўскіх колах, бо на працягу многіх гадоў апекаваўся каталіцкай супольнасцю літоўцаў у Гродне, кожную нядзелю цэлебраваў святую Імшу на літоўскай мове, маліўся разам з імі.
Пахаванне а. Казіміра Жыліса адбудзецца 19 лютага ў санктуарыі св. Андрэя Баболі ў Варшаве (Rakowiecka, 61).
Пачатак Імшы ў 10.30 па польскім часе (12.30 па беларускім).
Будзе праводзіцца анлайн-трансляцыя Імшы па спасылцы
Цела спачылага будзе пахавана на могілках Павонзкі ў Варшаве ў грабніцы езуітаў.
Айцец Казімір Жыліс нарадзіўся 4 сакавіка 1945 г. у Літве ў вёсцы Лігінішкіс.
Скончыў Каўнаскую семінарыю (Літва).
Атрымаў святарскія пасвячэнні з рук біскупа Лабукаса 17 красавіка 1973 г.
Апошнія некалькі гадоў святар служыў у Варшаве.
Вечны адпачынак дай яму, Пане…
