Дарагія чытачы!
У чарговы раз мы адзначаем святы Божага Нараджэння. Гэта радасныя, поўныя надзеі і аптымізму святы, якія маюць сямейны характар. У гэтым годзе, канешне, крыху інакш. А ўсё з прычыны пандэміі каранавірусу, якая перакрэсліла ўсе нашы планы і не дала нармальна пражыць гэты год.
Святы Божага Нараджэння заўсёды нясуць надзею, бо гэтай надзеяй з’яўляецца Езус, народжаны з Панны Марыі ў бэтлеемскай пячоры.
Дзякуючы вам за тое, што нястомна сочыце за падзеямі ў нашай дыяцэзіі, хочам пажадаць вам таго, што Божае. Хочам пажадаць, каб Езус быў у сэрцы кожнага чалавека. Каб Яго ласка дадала нам усім патрэбнае суцяшэнне, цеплыню, упэўненасць, бяспеку, асабліва, можа, тады, калі мы перажываем ізаляцыю, хваробу ці нават цярпенні.
Няхай Дзіцятка Езус паглыбляе ў нас веру, узмацняе надзею, а сэрцы напаўняе любоўю.
Благаслаўлёных святаў Божага Нараджэння і шчаслівага Новага 2021 года!
Супрацоўнікі сродкаў масавай інфармацыі Гродзенскай дыяцэзіі
