6 снежня, у ІІ нядзелю Адвэнту, у парафіяльным касцёле Маці Божай Нястомнай Дапамогі ў Парэччы (дэканат Гродна-Усход) адбылася святая Імша ў інтэнцыі с. Юзэфы Памаранскай з Кангрэгацыі Дачок Беззаганнага Сэрца Найсвяцейшай Панны Марыі (сарцанкі) у першую гадавіну яе смерці.
Эўхарыстыю з удзелам святароў, сясцёр законных i вернікаў узначаліў біскуп Гродзенскі Аляксандр Кашкевіч.
Прысутныя супольна маліліся аб дары вечнага жыцця для спачылай, якая ў памяці тых, хто яе ведаў, застанецца як законніца, якая любіла Бога, бліжняга і малітву.
Біскуп Кашкевіч падкрэсліў, што с. Юзэфа ўсё сваё жыццё, якое распачалося ў Бабчынцах на Украіне, правяла, жывучы ў ценю і вялікім прысвячэнні. Іерарх нагадаў пра цноту, якой адзначалася памерлая, – уменне дзяліцца з іншымі. Па словах біскупа, яна, будучы законніцай, мела не шмат, але тое, што мела, заўсёды была гатовая аддаць іншаму чалавеку, які знаходзіцца ў патрэбе.
Сястра Юзэфа Памаранская нарадзілася 20 кастрычніка 1928 г. на Украіне. Больш за 30 гадоў служыла біскупу Гродзенскаму, з таго часу, як ён быў пробашчам у парафіі Святога Духа ў Вільні.
З моманту стварэння Гродзенскай дыяцэзіі ў 1991 г. сястра Юзэфа разам з біскупам Кашкевічам прыбыла ў Гродна і да самага канца служыла яму ў біскупскім доме, спаўняючы хатнія абавязкі.
Памерла 7 снежня 2019 г., у вігілію патранальнай урачыстасці сваёй законнай супольнасці і гадавіну яе заснавання. Цела памерлай сястры былo пахавана на могілках у Парэччы.
Кс. Юрый Марціновіч