14 лістапада ў парафіі Унебаўзяцця Найсвяцейшай Панны Марыі і св. Язафата ў Сапоцкіне, адкуль паходзіў спачылы кс. канонік Юзаф Ганьчыц, адбылася святая Імша ў яго інтэнцыі ў 30-ы дзень пасля смерці.
Перад Эўхарыстыяй землякі кс. Юзафа прадставілі слоўна-музычную праграму, прысвечаную яго памяці. Праграма рыхтавалася сапоцкінскімі парафіянамі доўгі час і павінна была быць паказана на юбілей 25-годдзя яго святарства, які ён павінен быў адзначыць у кастрычніку ў сваёй роднай парафіі.
Але Бог меў свае планы, таму замест юбілейнай урачыстасці і вялікай радасці вернікі ўспаміналі спачылага, якім вельмі ганарацца, і дзякавалі Пану за дар яго жыцця. Таксама яны дзякавалі за яго добрае сэрца, якое за 25 гадоў служэння прынесла шмат дабра людзям, свету, гораду Лідзе, дзе ён служыў амаль усё сваё святарскае жыццё.
Падчас праграмы прагучала шмат цёплых слоў пра кс. Юзафа, які вельмі часта наведваў свае родныя мясціны, а цяпер застанецца ў жывой памяці, бо, як падкрэслілі вернікі, нельга забыць такога добрага чалавека і патрабавальнага святара.
На Імшы, якую цэлебраваў пробашч парафіі кс. Антоні Абухоўскі, прысутныя вернікі маліліся аб дары неба для ксяндза Юзафа, просячы добрага Бога даць яму ласку вечнага жыцця.
Ксёндз канонік Юзаф Ганьчыц нарадзіўся 3 ліпеня 1960 г. Паходзіў з парафіі Унебаўзяцця Найсвяцейшай Панны Марыі і св. Язафата ў Сапоцкіне.
Атрымаў сакрамэнт пасвячэння ў ступені прэзбітэрату 17 чэрвеня 1995 года з рук біскупа Гродзенскага Аляксандра Кашкевіча ў катэдры св. Францішка Ксаверыя ў Гродне. Стаў разам з сённяшнім дапаможным біскупам Гродзенскай дыяцэзіі Юзафам Станеўскім адным з першых выпускнікоў Вышэйшай духоўнай семінарыі ў Гродне.
Пасля пасвячэння быў прызначаны вікарыем парафіі св. Міхала Арханёла ў Ашмянах. З 10 ліпеня 1996 г. да смерці быў пробашчам новаўтворанай парафіі Святой Сям’і ў Лідзе. Дзякуючы яго старанням была пабудавана новая парафіяльная святыня.
За час яго служэння ў лідскай парафіі было створана шмат малітоўных груп. Шмат увагі і часу ён прысвячаў выхаванню дзяцей і моладзі, фармацыі сем’яў. Таксама пры парафіі актыўна дзейнічае каталіцкая харызматычна-евангелізацыйная супольнасць «Gloriosa Trinita», духоўным правадніком якой быў кс. Юзаф Ганьчыц.
У 2003 г. ён скончыў вывучэнне тэалогіі сужэнства ва ўніверсітэце кардынала Стэфана Вышынскага, а ў 2007 г. – катэхетычна-пастаральнае паслядыпломнае навучанне ў Люблінскім каталіцкім універсітэце ў Польшчы.
Сёлета кс. Ганьчыц адзначыў 60-годдзе і 25-годдзе прыняцця прэзбітэрскага пасвячэння.
Адышоў у вечнасць 13 кастрычніка ў лідскай бальніцы з-за ўскладненняў, выкліканых каранавіруснай інфекцыяй.
Кс. Юрый Марціновіч
