Члены Душпастырства чыгуначнікаў Гродна перад урачыстасцю Усіх Святых і ўспамінам усіх памерлых вернікаў прынялі ўдзел у прыбіранні найстарэйшых могілак горада. На старых гродзенскіх могілках спачывае шмат заслужаных для горада асобаў, а шматлікія надмагіллі маюць гістарычную і культурную каштоўнасць.

Каталіцкія могілкі заснаваны ў 1792 г., прыкладна ў той самы час, што і Павонзкаўскія (Польшча), Лычакаўскія (Украіна) некропалі і могілкі Роса (Літва). Тут захаваліся надмагіллі ў стылях класіцызму, эклектыкі, мадэрну, канструктывізму, зробленыя майстрамі з Гродна, Варшавы, Кіева, Вільні.

Даследчыкі зазначаюць, што надмагільныя помнікі ўяўляюць сабой унікальныя аб’екты дэкаратыўна-прыкладнога мастацтва, якія не маюць аналагаў на тэрыторыі Беларусі.

Наведваючы могілкі, члены душпастырства таксама памаліліся за тых, хто адышоў на вечны спачын, памятаючы, што найлепшым ушанаваннем памерлых продкаў з’яўляецца малітва.

Кс. Юрый Марціновіч