18 кастрычніка павялічылася колькасць міністрантаў у парафіi св. Яна Паўла ІІ у Смаргоні.
Некалькі хлопцаў пасля адпаведнай падрыхтоўкі далучыліся да літургічнай службы алтара. Цяпер яе супольнасць у парафіі налічвае каля 30 міністрантаў і кандыдатаў у міністранты.
Урачыстае прыняцце ў міністранты здзейсніў пробашч парафіі кс. Яўген Учкуроніс. Новыя міністранты далі абяцанне верна служыць Хрысту ля алтара, запэўніўшы, што будуць добрым прыкладам для свайго атачэння і будуць верна спаўняць даручаныя ім заданні.
Міністранты – жывы скарб кожнай святыні. Дзякуючы ім Касцёл амалоджваецца, іх прысутнасць ля алтара нясе надзею, што не будзе адсутнасці жадаючых пайсці за голасам паклікання і прысвяціць сваё жыццё выключнаму служэнню Богу. Пераважная частка святароў адкрыла сваё пакліканне ў дзяцінстве ці юнацтве, стоячы ля алтара.
Варта пажадаць, каб служэнне новых міністрантаў Богу было плённым і радасным.
Кс. Юрый Марціновіч
Фота: архіў парафіі св. Яна Паўла ІІ у Смаргоні
