Экскурсію на байдарках арганізавалі для моладзі парафіі св. Яна Паўла ІІ у Смаргоні

20 жніўня адбыўся аднадзённы сплаў-экскурсія па рацэ Вілія на байдарках для малодшай і старэйшай моладзі парафіі св. Яна Паўла ІІ у Смаргоні.

Падзея была прымеркавана да нагоды 100-годдзя з дня нараджэння святога Пантыфіка, якое адзначаецца сёлета.

Сваё падарожжа па вадзе парафіяне распачалі з малітвы ў гістарычным касцёле Найсвяцейшай Тройцы ў Данюшаве, які мае статус помніка архітэктуры. Там яны памаліліся за Беларусь, просячы добрага Бога, каб сярод яе жыхароў запанавала згода ў праўдзе і супакоі.

Удзельнікі мерапрыемства, якое прайшло пры цудоўным надвор’і, удзячныя найперш Богу за супольна праведзены час і магчымасць наблізіцца да Яго. Яны ўдзячныя таксама ўсім, хто прычыніўся да арганізацыi сплаву і хто распавёў ім цікавыя апавяданні пра іх малую радзіму.

Кс. Юрый Марціновіч

Фота: архіў парафіі св. Яна Паўла ІІ у Смаргоні