Святы Айцец прызначыў новым Апостальскім Нунцыем у Беларусі харвацкага іерарха, арцыбіскупа Антэ Ёзіча. Як паведамляе vaticannews.va, аб прызначэнні стала вядома 21 мая.
Антэ Ёзіч нарадзіўся 16 студзеня 1967 у горадзе Трыль. Святарскае пасвячэнне атрымаў 28 чэрвеня 1992 г. у складзе Сплітскай архідыяцэзіі.
У 1995 г. пачаў рыхтавацца да дыпламатычнай службы ў Папскай касцёльнай акадэміі. З 1999 г. працаваў у Апостальскай нунцыятуры ў Індыі. Потым, з 2003 г. па 2009 г. быў сакратаром нунцыятуры ў Расіі. У 2009 г. стаў дарадцам па нунцыятуры ў Філіпінах.
2 лютага 2019 г. Папа прызначыў яго Апостальскім нунцыем у Кот-д’Івуары і тытулярным арцыбіскупам Цысы. Біскупскае пасвячэнне яму павінен быў удзяліць 1 мая 2019 г. кардынал Дзяржсакратар Пьетра Паралін. Аднак 7 красавіка 2019 г. іерарх трапіў у аўтамабільную аварыю каля Спліта, пасля якой апынуўся ў бальніцы ў крытычным стане.
22 студзеня 2020 г. арцыбіскуп Ёзіч сустрэўся з Францішкам. Біскупская сакра павінна была адбыцца 21 сакавіка 2020 г. у базыліцы св. Пятра, аднак яна была перанесена па прычыне пандэміі COVID-19.
Арцыбіскуп Ёзіч зменіць на пасадзе Апостальскага нунцыя ў Беларусі венгерскага арцыбіскупа Габара Пінтэра.
