24 красавіка біскуп Гродзенскі Аляксандр Кашкевіч здзейсніў персанальныя змены дваіх святароў, якія служаць у дыяцэзіі.

Прадстаўляем інфармацыю аб новых прызначэннях.

Ксёндз Павел Звяжынскі вызвалены ад абавязкаў пробашча парафіі св. Юрыя ў Варнянах (Астравецкі дэканат) і прызначаны пробашчам парафіі св. Станіслава Косткі ў Ваўкавыску (Ваўкавыскі дэканат).

Ксёндз Павел заменіць спачылага кс. каноніка Алега Дуля, які апошнія 13 гадоў быў пробашчам гэтай парафіі.

Ксёндз Віктар Захарэўскі вызвалены ад абавязкаў пробашча парафіі святых Анёлаў Ахоўнікаў у Раготне, адміністратара парафіі Найсвяцейшай Тройцы ў Стараельні i адміністратара парафіі Божага Цела ў Дварцы (Дзятлаўскі дэканат) i прызначаны пробашчам парафіі св. Юрыя ў Варнянах (Астравецкі дэканат).

Біскуп Кашкевіч падзякаваў святарам за ранейшае служэнне ў парафіях, а таксама ўдзяліў благаслаўленне на спаўненне новых адказных душпастырскіх абавязкаў.

Ксёндз Павел Звяжынскі паходзіць з парафіі Узвышэння Святога Крыжа ў Лідзе (Фара). Прэзбітэрскае пасвячэнне яму ўдзяліў біскуп Гродзенскі Аляксандр Кашкевіч 16 кастрычніка 1999 г. у катэдры св. Францішка Ксаверыя ў Гродне.

Ксёндз Віктар Захарэўскі паходзіць з парафіі св. Яна Хрысціцеля ў Гальшанах (Ашмянскі дэканат). Прэзбітэрскае пасвячэнне яму ўдзяліў біскуп Гродзенскі Аляксандр Кашкевіч 16 лістапада 2006 г. у катэдры св. Францішка Ксаверыя ў Гродне.

Кс. Юрый Марціновіч