У гэты складаны перыяд, які абумоўлены эпідэміялагічнай сітуацыяй у свеце, звязанай з каранавірусам, вакол з’явілася яшчэ больш людзей, якія маюць патрэбу ў дапамозе бліжняга, і гэта час, калі можна і трэба праявіць любоў і міласэрнасць.
Валанцёры і працаўнікі Рэлігійнай місіі “Дабрачыннае каталіцкае таварыства “Карытас”” Гродзенскай дыяцэзіі рэгулярна, два разы на тыдзень наведваюць састарэлых, самотных, якія засталіся без падтрымкі родных і блізкіх. Яны перадаюць патрабуючым прадукты харчавання (крупы, кансервы, слодычы і г.д.). Безумоўна, наведванні не абыходзяцца без душэўнай размовы, бо самотныя людзі асабліва маюць патрэбу ва ўвазе і адчуванні, што ты не абыякавы грамадству.
“Карытас” выказвае падзяку “Каталіцкай моладзевай асацыяцыі”, якая арганізавала акцыю “Паляк з сэрцам” і прапанавала прадукты харчавання для патрабуючых. Гэтыя прадукты таксама былі перададзены валанцёрамі патрабуючым і тым, хто знаходзіцца ў цяжкай жыццёвай сітуацыі.
Акрамя таго, працягвае сваю працу “Кухня для бедных”, дзе кожны патрабуючы можа атрымаць гарачы абед.
У сувязі са складаным эпідэміялагічным становішчам урачысты абед для бяздомных і бедных з нагоды святкавання Вялікадня быў адменены. Але ніхто не пайшоў з пустымі рукамі – кожны атрымаў святочны абед навынас (такі абед атрымалі 96 чалавек).
