Арцыбіскуп Тадэвуш Кандрусевіч, Старшыня Канферэнцыі Каталіцкіх Біскупаў у Беларусі, з клопатам пра духоўнае і фізічнае дабро вернікаў і ўсяго беларускага народа уводзіць абавязковыя прафілактычныя санітарныя захады, мэта якіх стрымаць распаўсюджванне эпідэміі каранавірусу ў нашай краіне.
Распараджэнне Старшыні Канферэнцыі Каталіцкіх Біскупаў у Беларусі.
Складаная эпідэміялагічная сітуацыя, якая склалася ў свеце ў сувязі з пандэміяй каранавірусу, заклікае нас да адказнага стаўлення да гэтай праблемы.
Як веруючыя людзі, мы перадусім павінны звяртацца да Бога, без якога нічога не зможам зрабіць (пар. Ян 15, 5) і вера ў Якога аздараўляе (пар. Лк 17, 19). Таму заклікаю ўсіх вернікаў да малітвы ў інтэнцыі прадухілення пандэміі каранавірусу. Выкарыстаем дадзены нам Божым Провідам час, асабліва Вялікі пост, каб праз малітву, устрыманне, дабрачыннасць, споведзь, удзел у Эўхарыстыі, набажэнствах Крыжовага шляху і Песняў жальбы, Ружанец, Вяночак да Божай Міласэрнасці, прапанаваную Папам Францішкам малітву «24 гадзіны для Пана», якая пройдзе 29–30 сакавіка, літаніі, Суплікацыю і іншыя пабожныя практыкі міласэрны Бог захаваў нас ад гэтай бяды.
Акрамя таго, пасля кансультацыі з біскупамі каталіцкіх дыяцэзій на Беларусі, загадваю наступнае.
Беручы пад увагу няспыннае распаўсюджванне небяспечнай хваробы, з вераю ў Божы Провід і з клопатам пра здароў’е ўсіх нашых грамадзянаў, у Каталіцкім Касцёле ў Беларусі, які клапоціцца пра духоўнае і фізічнае дабро сваіх вернікаў і ўсяго народа, уводзяцца наступныя прафілактычныя санітарныя захады.
1. Ушанаванне святога Крыжа, абразоў і рэліквій адбываецца праз укленчванне ці глыбокі паклон без дотыку і цалавання.
2. Не напаўняць крапільніцы ў касцёлах асвячонай вадой і растлумачыць вернікам пра неабходнасць на пэўны час устрымацца ад іх выкарыстання.
3. На ваконцах (кратах) канфесіяналаў павінен быць усталяваны абарончы матэрыял, які неабходна рэгулярна дэзінфіцыяваць і змяняць з захаваннем мераў перасцярогі.
4. Знак супакою перадаецца схіленнем галавы, без тактыльнага кантакту.
5. Перад цэлебрацыяй Эўхарыстыі духоўныя асобы і міністранты павінны старанна вымыць рукі і падчас яе няўхільна захоўваць нормы гігіены.
Гэтае Распараджэнне дзейнічае да яго адмены.
Усемагутны Божа, праз заступніцтва апякункі Беларусі Маці Божай Будслаўскай і апекуна ад заразных хваробаў святога Роха выбаві нас ад эпідэміі каранавірусу, адары здароў’ем хворых і падтрымай сваёй дапамогай супрацоўнікаў службы аховы здароў’я, якія імі апякуюцца.
З благаслаўленнем,
Арцыбіскуп Тадэвуш Кандрусевіч
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі
Мінск, 13 сакавіка 2020 г., 7-я гадавіна абрання Папы Францішка
P.S. Святарам належыць прачытаць гэтае Распараджэнне вернікам у Трэцюю нядзелю Вялікага посту 15 сакавіка 2020 г.
