У Сапоцкіне недалёка ад Гродна паспяхова вядзецца будаўніцтва Дома для прабывання людзей састарэлага ўзросту. У 2017 г. для рэалізацыі гэтага праекту быў выкуплены будынак былой польскай школы.
Гэта адзін з праектаў, скіраваных на інвеставанне ў развіццё інфраструктуры сацыяльна значных аб’ектаў на тэрыторыі дыяцэзіі, якія ў апошні час рэалізуе дабрачыннае каталіцкае таварыства “Caritas” Гродзенскай дыяцэзіі.
Плануецца, што ў гэтым доме будзе пражываць каля 50 чалавек. Каб змясціць такую колькасць жыхароў, будынак быў пашыраны шляхам будаўніцтва дадатковага паверха. На сённяшні момант заменены старыя інжынерныя сеткі на новыя (электрыка, ацяпленне, каналізацыя, вентыляцыя), вядзецца мантаж вокнаў.
У вёсцы Нецеч Лідскага раёна на працягу многіх гадоў дзейнічае дзіцячы лагер “Caritas”.
У лагеры шмат робіцца для таго, каб арганізаваць паўнавартасныя ўмовы для адпачынку і развіцця дзяцей.
У будынку лагера ў апошні час быў праведзены рамонт: абноўлены фасад, заменены інжынерныя сеткі (вадаправод, электрасеткі), плануецца рамонт пакояў. Таму ў новым сезоне дзеці будуць адпачываць у яшчэ больш камфортных умовах.
Усе гэтыя праекты ажыццяўляюцца дзякуючы фінансавай падтрымцы Сенату Рэспублікі Польшча і фонду “Дапамога палякам на ўсходзе”.
