Святую Імшу Пастэрку ў ноч Божага Нараджэння ў касцёле св. Станіслава Косткі ў Ваўкавыску цэлебраваў Генеральны вікарый Гродзенскай дыяцэзіі біскуп Юзаф Станеўскі.

Іерарх прыбыў у парафію па запрашэнні пробашча кс. каноніка Алега Дуля, каб разам з вернікамі ўзгадваць і святкаваць падзеі бэтлеемскай ночы.

У гаміліі біскуп падкрэсліў, што Езус, нарадзіўшыся ў вельмі бедных умовах бэтлеемскай пячоры, прыйшоў для таго, каб адарыць чалавецтва супакоем, вучыць ахвярнай любові да канца і несці ўсім радасць.

Таму іерарх пажадаў усім вернікам міру і еднасці – у кожнай сям’і, кожным доме і супольнасці. Таксама ён пажадаў, каб пасланне аб міласэрнай любові, якое прыносіць на зямлю народжаны Божы Сын, напаўняла ўсе чалавечыя сэрцы, а радасная сустрэча з Езусам, які ляжыць у яслях, была крыніцай глыбокай веры, надзеі і ахвярнай любові.

Кс. Юрый Марціновіч