Раніцай 11 снежня ў капліцы Вышэйшай духоўнай семінарыі ў Гродне дапаможны біскуп Гродзенскай дыяцэзіі Юзаф Станеўскі цэлебраваў св. Імшу падзякі ў 25-ю гадавіну дыяканскага пасвячэння.
Усе прысутныя на Эўхарыстыі – выхавацелі і семінарысты – далучыліся да падзякі Богу за дар паклікання і дар святарства ў трох ступенях для біскупа Юзафа.
8 снежня 1994 года ў гродзенскай катэдры біскуп Аляксандр Кашкевіч удзяліў дыяканскае пасвячэнне навучэнцам Гродзенскай семінарыі: Юзафу Станеўскаму, Юзафу Ганьчыцу, Антонію Клімантовічу, Яну Крэмісу і Андрэю Бародзічу. Гэта было першае пасвячэнне семінарыстаў у гісторыі гродзенскай Alma Mater з часу яе заснавання.
Рэкалекцыі перад прыняццем сакрамэнту пасвячэння для тагачасных кандыдатаў адбыліся з 1 па 7 снежня ў Ішчалне (Шчучынскі дэканат), правёў іх кс. прэлат Вінцэнт Лісоўскі. Аб рэкалекцыях засталася памятка – абразік з подпісам кс. Вінцэнта, які да сённяшняга дня захаваў біскуп Юзаф Станеўскі ў сваім брэвіярыі. З пасвячэння дыяканату біскуп захаваў і фотаздымкі.
“Пайшоў тады зрабіць гэтыя фотаздымкі ў фотаатэлье. Дык у мяне спыталі: “А што гэта вы ў жмуркі, лежачы, гуляеце?” Тады яшчэ не разумелі гэтага”, – прыгадаў з усмешкай біскуп.
Юбіляр дадаў, што “гадавіну дыяканскага пасвячэння амаль ніхто не адзначае, але, перш за ўсё, дыяканат з’яўляецца першай і немалазначнай ступенню пасвячэння, а таксама з моманту прыняцця дыяканату свецкі чалавек становіцца духоўным”.
Aндрэй Юхнік
Фота: Павел Леановіч, з асабістага архіву біскупа Юзафа Станеўскага
