16-17 лістапада ў Чэнстахове (Польшча) адбылася 36-я пілігрымка чыгуначнікаў. Сёлетняя сустрэча праходзіла пад дэвізам “Няхай сыдзе Дух Твой і адновіць аблічча зямлі, гэтай зямлі”.
Пілігрымка адбывалася ў духу падзякі Богу і Найсвяцейшай Маці за 40-годдзе з часу першаг візіту Яна Паўла ІІ у Польшчу і 25-годдзе з часу заснавання Каталіцкага таварыства польскіх чыгуначнікаў.
На Яснай Гары, ля трону Чорнай Мадонны, сабраліся працаўнікі чыгункі розных гарадоў Польшчы і іншых краін.
Прысутнічала таксама група ў складзе 49 чалавек з Душпастырства чыгуначнікаў Гродзенскай дыяцэзіі са сваім душпастырам а. Эдуардам Пяцельчыцам SsR.
Удзельнікі маліліся, каб усе працаўнікі чыгункі вылучаліся любоўю і справядлівасцю, сумленнасцю і ахвярнасцю ў служэнні, павагай да іншых і клопатам пра супольнае дабро.
Мацярынскай апецы Панны Марыі яны даверылі свае сем’і і месцы працы.
Урачыстасці ўзначаліў арцыбіскуп Катавіцкі Віктар Скворц.
Kс. Юрый Марціновіч
Фота: Святлана Вярышка
