Адзін новы прэзбітэр і пяць дыяканаў. Урачыстасць пасвячэнняў адбылася ў Гродне

16 лістапада, ва ўрачыстасць Найсвяцейшай Панны Марыі Вастрабрамскай, галоўнай Апякункі Гродзенскай дыяцэзіі, біскуп Гродзенскі Аляксандр Кашкевіч удзяліў прэзбітэрскае пасвячэнне аднаму дыякану і дыяканскае пасвячэнне пяці семінарыстам. Урачыстасць адбылася ў катэдральным касцёле св. Францішка Ксаверыя ў Гродне.

Прэзбітэрам Касцёла на Гродзеншчыне стаў дыякан Віталій Валюк, які паходзіць з парафіі Божага Цела ў Крамяніцы (Ваўкавыскі дэканат).

Дыяканскае пасвячэнне прынялі:

Яўген Амасёнак з парафіі Cвятога Андрэя ў Слоніме (Слонімскі дэканат),

Андрэй Струкель з парафіі Узвышэння Святога Крыжа ў Лідзе (Лідскі дэканат),

Павел Шэмет з парафіі Унебаўзяцця Найсвяцейшай Панны Марыі ў Капцёўцы (дэканат Гродна-Захад),

Томаш Мікалайчык з парафіі Узвышэння Святога Крыжа ў Лідзе (Лідскі дэканат) i

Дзмітрый Малец з парафіі Святой Сям’і ў Лідзе (Лідскі дэканат).

Урачыстая святая Імша сабрала шматлікіх святароў і вернікаў, якія прыбылі з розных бакоў дыяцэзіі, каб падтрымаць малітвамі кандыдатаў да пасвячэння. Прысутнічалі таксама іх бацькі і прадстаўнікі парафіяльных супольнасцяў, адкуль яны паходзяць.

Maрыя – прыклад малітвы і адарацыі

У гаміліі біскуп Гродзенскі сказаў пра ўрачыстасць Найсвяцейшай Панны Марыі Вастрабрамскай, Маці Міласэрнасці, якая з моманту стварэння дыяцэзіі з’яўляецца яе Апякункай. Іерарх падкрэсліў, што “Марыя ведае сховішчы нашых душаў, наш боль і радасці, бо з’яўляецца Жанчынай сузірання, умее слухаць”.

Кажучы пра Марыю ў вастрабрамскім абразе, біскуп адзначыў, што Яна не паказвае нам Сына Божага ў чалавечай прыродзе, не трымае Яго на руках, запрашаючы да адарацыі, а адаруе Яго сама, сузірае Хрыста ў таямніцы ўцелаўлення.

“Усёй сваёй істотай Марыя злучана з Езусам і пагружана ў глыбокую адарацыю. Яна ведае, што Той, каго чалавечыя вочы яшчэ не бачаць, ужо прысутны ў свеце. Боская справа збаўлення чалавецтва ўжо распачалася”, – дадаў іерарх.

Пастыр Касцёла на Гродзеншчыне нагадаў кандыдатам абавязкі, якія вынікаюць з прыняцця пасвячэння ў ступені дыяканату і прэзбітэрату. Па яго словах, каб паспяхова рэалізаваць гэтую вялікую задачу, якую даручае ім Касцёл, трэба вучыцца ад Марыі быць людзьмі малітвы і сузірання.

“Марыя, якая адаруе Езуса Хрыста, вучыць нас, што позіркам веры можна ўбачыць і агарнуць тое, што схавана перад цялеснымі вачыма. Вачыма веры мы бачым у Эўхарыстыі Цела і Кроў Хрыста пад постацямі хлеба і віна”, – сказаў біскуп.

Ён падкрэсліў, што патрабаванні, якія Хрыстус ставіць перад сваімі святарамі, вялікія і важныя. “Можа здавацца, што яны наогул пераўзыходзяць абмежаваныя духоўныя магчымасці чалавека. Але, паслухмяныя аб’яўленаму Божаму слову, мы верым, што для Бога няма нічога немагчымага, што Яго ласка прыходзіць з дапамогай да нашых чалавечых слабасцяў”, – дадаў іерарх.

Біскуп заахвоціў сваіх новых супрацоўнікаў быць людзьмі малітвы, кожны дзень жыць верай і адарацыяй Езуса Хрыста – як верыла Марыя і адаравала Яго на працягу жыцця, з моманту, калі сказала Богу сваё “так”.

“Адаруйце Езуса ўсім сэрцам, услухоўвайцеся ў Яго голас, адкрывайце для сябе кожны дзень Яго бясконцую міласэрнасць – і будзеце Яго вернымі слугамі, распарадчыкамі Божых сакрамэнтаў, правадырамі вернага люду на шляху да збаўлення”, – адзначыў іерарх.

Mалітоўнае спадарожнічанне святарам

На заканчэнне Эўхарыстыі біскуп выказаў словы ўдзячнасці бацькам, братам і сёстрам, дзядулям і бабулям, сваякам новых прэзбітэра і дыяканаў за верy, якую новапасвячаныя вынеслі з родных дамоў.

Ксёндз Віталій Валюк ад імя тых, хто прыняў пасвячэнні, выказаў словы ўдзячнасці ўсім, хто падтрымліваў іх на шляху, які вядзе да Хрыстовага алтара, і папрасіў аб далейшым малітоўным спадарожнічанні.

Новы прэзбітэр быў пакліканы да трайной місіі ў Касцёле: святарскай, настаўніцкай і пастырскай. У імя Хрыста ён будзе складаць Яго ахвяру, а таксама разам з Ім складаць у ахвяру самога сябе і абвяшчаць Евангелле, каб кожны чалавек праз ягo служэнне мог знайсці шлях да Бога.

Дыяканы былі пасвячаны на служэнне Касцёлу і пакліканы да нястомнага развіцця сваіх паводзінаў на ўзор Хрыста, а як слугi – пакліканы да таго, каб адзначацца вернасцю, чыстым сумленнем, любоўю без заганы, шчырым і руплівым сведчаннем жыцця, а таксама клопатам пра іншых.

Сёння Пан Бог пасылае новых працаўнікоў на сваё жніво, на жніво Касцёла на Гродзеншчыне. Ёсць яшчэ шмат сэрцаў, якія чакаюць Евангелля, маюць патрэбу ў святарскім слове і жадаюць удзельнічаць у сакрамэнтальным жыцці Касцёла.

Будзем жа маліцца за новага прэзбітэра і дыяканаў, каб яны ў моцы Духа Святога дасягалі тых, хто прагне Пана Бога. Каб яны заўсёды былі верныя Хрысту і Касцёлу, a таксама памнажалі той вялікі дар, які атрымалі ад Бога.

Kс. Юрый Марціновіч 

Фота: Павел Леановіч