Адам, дзе ты? Дзе мужчына ў сённяшнім свеце? Куды сёння мужчына ўцякае, у чым хаваецца? Цi ведаю я, у чым маё паклiканне? Да чаго паклiканы мужчына? Быць бацькам і мужам! Бог выбiрае мужчын і дае паклiканне. Цi мая жонка – гэта мой сябра, да якога iмкнуся? Цi ў мяне толькi з ёй “кантракт” на сумеснае пражыванне?
Над гэтымi i iншымі пытаннямi разважалi мужчыны з Асацыяцыi Святой Сям’і, якая сёлета адзначае 10-гадовы юбілей існавання ў Беларусі, у Навагрудку з 18 па 20 кастрычнiка.
Духоўныя практыкаванні праводзіў кс. Алег Шпець TChr з Мінска. На сустрэчы прысутнічала 12 мужчын: трое з Мінска, чацвёра з Гродна і Глыбокага, адзін з Навагрудка – сімвалічная лічба, бо столькі апосталаў было ў Езуса.
З прапановай правядзення рэкалекцый у дадзеным фармаце выступілі самі мужчыны падчас летніх рэкалекцый для сем’яў асацыяцыі.
Ніхто не ведаў, чаго чакаць ад такой сустрэчы, але пасля завяршэння рэкалекцый, па словах арганізатараў, мужчыны ад’язджалі ўмацаваныя ў духу і з вялікім запалам да жыцця.
У плане дня былі адарацыя Найсвяцейшага Сакрамэнту, святая Імша, канферэнцыя, разважанне над Божым словам і дзяленне жыццёвым досведам.
Сястра Марыяна Алешчык CSFN, адказная за Асацыяцыю Святой Сям’і ў нашай краіне, адзначае, што вельмі ўдзячная Богу за тое, што даў такое натхненне ўдзельнікам і ініцыятыву такіх рэкалекцый.
“Я бачыла мужчын, якія моляцца за свае сем’і, перажываюць за сваіх жонак, якіх яны кахаюць. Бачыла мужчын, якія шчыра дзеляцца перажываннямі, прызнаюцца ў сваёй недасканаласці. Бачыла мужчын, якія шчыра суперажываюць, бачыла моцных мужчын, якія плакалі, калі сведчылі”, – дадае законніца, у якой рэкалекцыі пакінулі вялікае ўражанне.
Для саміх мужчын гэты час быў таксама благаслаўлёным, і яны лічаць, што добра выкарысталі яго. Дзмітрый Шаршунс з Глыбокага (Віцебская дыяцэзія) адзначае, што вельмі любіць праводзіць час з сям’ёй. Па яго словах, заўсёды цудоўна быць на сямейных рэкалекцыях, але сустрэча мужчын – гэта зусім іншае.
“Неяк па-асабліваму перажывалася ўсё, што адбывалася. Проста калі пакінуты толькі сабе і зусім нічога не адцягвае ўвагі, можна цалкам акунуцца ў роздумы, больш уважліва выслухаць канферэнцыю і больш часу прысвяціць малітве”, – кажа мужчына.
Удзельнікі рэкалекцый удзячныя кс. Алегу Шпецю за правядзенне, адкрытасць і ўвагу да кожнага.
Кс. Юрый Марціновіч
