Цнотам Марыі вучыліся падчас летняга адпачынку дзеці з лідскай Фары

З 19 па 24 жніўня ў парафіі Узвышэння Святого Крыжа ў Лідзе (Фара) адбыўся другі тур «канікул з Богам». Дэвізам сёлетняга адпачынку сталі словы «Праз Марыю набліжаемся да Езуса».

На працягу амаль тыдня 150 дзяцей паглыблялі свае веды аб жыцці Маці Божай і вучыліся ад Яе пакоры, паслухмянасці і любові. Дапамагалі ім у гэтым аніматары, якія, пераапранаючыся ў Марыю і іншых герояў, наглядна паказвалі, што адбывалася амаль 2000 гадоў таму.

Цэнтрам кожнага дня была святая Імша, падчас якой кс. Станіслаў Краўчанка разважаў з удзельнікамі аб тым, што трэба рабіць, каб трапіць у Божае Валадарства.

Пасля невялікага сняданку і зарадкі дзеці мелі магчымасць наведаць кінатэатр, пакатацца на каньках, паспаборнічаць у гульнях і праводзіць час у сваіх камандах. Добрай нагодай для духоўнага адпачынку стала адарацыя Найсвяцейшага Сакрамэнту, калі дзеці маглі падзякаваць Езусу, перапрасіць Яго і папрасіць аб нечым. Таксама можна было прыступіць да сакрамэнту пакаяння.

Скончыўся летнік традыцыйным канцэртам, да якога дзеці рыхтаваліся на працягу тыдня. Падвёўшы вынікі, кс. Віталій Сідорка пажадаў дзецям і моладзі поспехаў у новым навучальным і катэхетычным годзе і благаславіў усіх прысутных на апошнія дні адпачынку.

Яна Чайко

Фотa: Яна Чайко і Марыя Чарняк