6-12 жнiўня ў кляштары Кангрэгацыі Найсвяцейшай Сям’і з Назарэта (назарэтанкі) адбыліся рэкалекцыі для сем’яў. На іх сабраліся сужэнцы разам са сваімі дзецьмі з Гродна, Ліды, Смаргоні, i іншых месцаў нашай краіны, дзе дзейнічае Асацыяцыя Святой Сям’і. Усіх разам было 74 чалавекі, наймалодшаму ўдзельніку рэкалекцый было 2 месяцы.
Духоўныя практыкаванні праводзілі кс. Міхалай Ціхановіч, пробашч парафіі Найсвяцейшай Тройцы ў Глыбокім (Віцебская дыяцэзія), і сёстры назарэтанкі.
Галоўнай тэмай рэкалекцый, над якой кожны дзень падчас канферэнцый і працы ў групах разважалі ўдзельнікі, была Эўхарыстыя. Прысутныя разам вучыліся правільна перажываць Эўхарыстыю і разумець яе. На заканчэнне духоўных практыкаванняў яны адзінадушна сцвердзілі, што тэма Эўхарыстыі нялёгкая, але была ім вельмі патрэбная.
У праграме кожнага дня былі святая Імша, канферэнцыі, адарацыя Найсвяцейшага Сакрамэнту, а напрыканцы дня праводзіліся вечары, якія былі магчымасцю інтэграцыі, умацавання сужэнскіх і сямейных сувязяў, узаемнага сведчання веры.
У гэтым годзе Асацыяцыя Святой Сям’і з Назарэта пры Кангрэгацыi сясцёр назарэтанак адзначае 10-годдзе сваёй дзейнасці ў нашай краіне.
Kс. Юрый Марціновіч
Фота: с. Марыяна Алешчык CSFN, с. Клара Волчэк CSFN
