Вырушыла ў 18-ы раз пілігрымка Гродна-Рось

02 Жніўня 2019

ros start 50 2 жніўня з гродзенскага касцёла Беззаганнага Зачацця Найсвяцейшай Панны Марыі вырушыла XVIII пешая пілігрымка ў санктуарый Пана Езуса Журботнага ў Росі. Дэвіз пілігрымкі ў гэтым годзе – “Сям’я: дар і абавязак, надзея чалавецтва”.

Пілігрымка па традыцыі пачалася з самай раніцы св. Імшой, якую ўзначаліў біскуп Гродзенскі Аляксандр Кашкевіч. Іерарх маліўся падчас Эўхарыстыі ў інтэнцыі ўсіх пілігрымаў, каб гэты шлях умацаваў іх у веры і любові да Бога і Яго Касцёла.

У гаміліі кіраўнік пілігрымкі Гродна-Рось кс. Юрый Марціновіч адзначыў, што кожны чалавек, а асабліва пілігрым, можа быць пасланцам Бога. “Выходзячы сёння ў дарогу, падчас якой будзем сустракаць розных людзей, будзем для іх усіх пасланцамі Бога. Пакажам ім веру, пакажам ім нашу веру і спосаб яе перажывання”, – дадаў святар.

Кіраўнік пілігрымкі заахвоціў паказаць у час шляху іншым сваю хрысціянскую тоеснасць. “Пакажам усім гэтым выпадковым прахожым і тым, хто будзе адчыняць дзверы сваіх дамоў і сэрцаў, што нельга ніколі адкідваць любові Бога, аб’яўленай у Езусе Хрысце”, – сказаў ён.

ros start 35

На заканчэнне Імшы біскуп Аляксандр Кашкевіч папрасіў пілігрымаў, каб яны падчас шлях у памяталі ў сваіх малітвах аб Гродзенскай дыяцэзіі.

“Маліцеся аб новых і шматлікіх пакліканнях да служэння ў Касцёле. Агарніце сваімі малітвамі таксама ўсе нашы сем’і, каб яны былі моцнымі Богам, маліцеся аб новых і шматлікіх пакліканнях да служэння ў нашым Касцёле”, – указаў на асаблівыя інтэнцыі іерарх.

Біскуп пажадаў, каб паломніцтва было для кожнага “благаслаўлёным часам унутранага аднаўлення і духоўнага адраджэння”.

У пілігрымцы прымаюць удзел прадстаўнікі розных пакаленняў вернікаў з Гродзенскай дыяцэзіі, Мінска-Магілёўскай архідыяцэзіі, Пінскай дыяцэзіі, а таксама з замежжа.

У першы дзень шляху паломнікі пераадолелі больш за 40 км. Абед для пілігрымаў падрыхтавала парафія Беззаганнага Зачацця Найсвяцейшай Панны Марыі ў Квасоўцы. На начлег дзверы сваіх дамоў і сэрцаў ім адчыняюць вернікі парафіі Імя Найсвяцейшай Панны Марыі i св. Яна Непамука ў Вялікіх Эйсмантах.