Іўеўскі дэканат пілігрымуе ў Тракелі

8 ліпеня пілігрымаванне ў дыяцэзіяльны санктуарый Маці Божай Каралевы нашых сем’яў у Тракелях распачалі вернікі Іўеўскага дэканату. Дэвіз сёлетняй пілігрымкі – “Марыя, атулі нашыя сем’і”. У гэтым годзе пілігрымы з дэканату вырушылі ў шлях у 22-і раз.

Паломніцтва стартавала з парафіі Найсвяцейшай Тройцы ў Сурвілішках. Маршрут прадуманы так, што на працягу пяці дзён шляху да санктуарыя ўдзельнікі наведаюць усе святыні Іўеўскага дэканату. Па дарозе далучацца новыя пілігрымы. Гэта моладзевая пілігрымка, бо ў ёй удзельнічаюць вучні школ, студэнты і працуючая моладзь.

Кіраўнік пілігрымкі, кс. Ян Гавецкі, пробашч парафіі Святых апосталаў Пятра і Паўла ў Іўі, які арганізуе яе з самага пачатку, па традыцыі крочыць у першых шэрагах.

Пяць дзён шляху да дыяцэзіяльнага санктуарыя стануць добрай нагодай для ўдзельнікаў паглыбіць сваю веру. Праз узіранне ў прыклад Марыі, аддаванне кожнай думкі і кожнай справы Усемагутнаму пілігрымаванне стане радасным узрастаннем да паглыблення кантакту з Богам.

У апошнія гады пілігрымка Іўеўскага дэканату была самай шматлікай. У ёй у Тракелі прыходзіць больш за 200 чалавек.

Кс. Юрый Марціновіч

Фота: Раман Ярмош