28 чэрвеня, у дзень парафіяльнага фэсту, адзначыў 25-годдзе святарства кс. Леанард Станкоўскі, пробашч парафіі ў Солах, дэкан Смаргонскага дэканату.
Ксёндз Леанард скончыў Рыжскую духоўную семінарыю, прэзбітэрскае пасвячэнне атрымаў з рук біскупа Гродзенскага Аляксандра Кашкевіча.
Святую Імшу ў парафіяльнай святыні Маці Божай Ружанцовай узначаліў сам юбіляр. На ёй сабралося каля 30 святароў. Гамілію прамовіў кс. кан. Здзіслаў Вэдэр SDB, падкрэсліўшы ў ёй важнасць святарскага служэння. Ён распавёў пра радасныя і цяжкія моманты святарства.
Музычна ўпрыгожыў Імшу ансамбль “Kresowiace” з Ліды. Таксама пасля Эўхарыстыі адбыўся канцэрт.
Асаблівым было віншаванне дзяцей. Ад створанай імі камісіі пробашч атрымаў дыплом за святарскую дзейнасць з выдатнымі адзнакамі.
Напрыканцы ўрачыстасці кс. кан. Юзаф Багдзевіч, біскупскі вікарый смаргонскага рэгіёну, прачытаў дэкрэт аб наданні біскупам Гродзенскім кс. Леанарду тытулу ганаровага каноніка Гродзенскага катэдральнага капітула Унебаўзяцця Найсвяцейшай Панны Марыі і св. Казіміра.
Ксёндз Станкоўскі падзякаваў усім прысутным за ўдзел у літургіі і за дар супольнай малітвы.
Томаш Мікалайчык
