11 чэрвеня ў Вышэйшай духоўнай семінарыі ў Гродне адбылося завяршэнне навучальнага года. Пасля адмысловай сесii, падчас якой былi падведзены вынiкi года, у семiнарыйнай каплiцы адбылася ўрачыстая святая Імша.
Узначаліў Эўхарыстыю Мітрапаліт Мінска-Магілёўскі арцыбіскуп Тадэвуш Кандрусевіч. На літургіі прысутнічалі біскуп Гродзенскі Аляксандр Кашкевіч, дапаможны біскуп Гродзенскай дыяцэзіі Юзаф Станеўскі, выкладчыкі і семінарысты.
Усіх сабраных прывітаў рэктар семінарыі кс. Віталій Вайцяхоўскі.
У гамiлii арцыбіскуп Тадэвуш Кандрусевіч засяродзіў увагу на постаці апекуна гэтага дня – святога апостала Барнабы. Іерарх адзначыў, што на самой справе Барнаба не быў апосталам, выбраным Езусам, але такiм яго называе традыцыя. Арцыбіскуп падкрэсліў, што менавiта Барнаба знайшоў Саўла і прывёў Яго да апосталаў, каб потым спадарожнiчаць яму, як апосталу народаў Паўлу, у абвяшчэннi Евангелля. „Так часта бывае ў жыццi, што нехта вельмі моцна ўплывае на чалавека і той змяняе сваё жыццё. Аб гэтым можа засведчыць не адзін святар і клерык”, – дадаў Мітрапаліт.
Іерарх нагадаў, што на самой справе да святарства кліча Бог, але вельмі часта праз прыклад іншых духоўных асоб.
Старшыня епіскапату Беларусі дадаў, што гэтая святая Імша – нагода выразіць Пану Богу ўдзячнасць за чарговы год фармацыі да святарства ў гродзенскай семінарыі, які не для ўсіх быў лёгкім. Было шмат праблем з прызывам у войска, aдным навука давалася лёгка, іншым складана, не заўсёды проста было з чалавечай, духоўнай і пастырскай фармацыяй. „Аднак калі Бог сапраўды кліча, то і дае адпаведныя ласкі, каб паспяхова пераадолець цяжкасці і потым быць добрым святаром”, – падкрэсліў арцыбіскуп Тадэвуш.
Іерарх заклікаў семінарыстаў ва ўсіх складанасцях давярацца Богу. Звяртаючыся да будучых святароў, якія распачынаюць час канікул, ён пажадаў, каб гэта быў час адпачынку і практычнага пастырскага досведу, які будзе вельмі патрэбны ў будучыні.
„Няхай гэта будзе час сведчання паклікання да святарства. Сведчанне семінарыстаў можа стаць зернем паклікання для шукаючых свой жыццёвы шлях юнакоў”, – сказаў арцыбіскуп.
Пасля Імшы ў семінарыйнай сталовай адбыўся супольны абед, а потым семінарысты распачалі заслужаны час канікул.
Kс. Юрый Марціновіч
Фота: Мікіта Барташэвіч
