26 сакавіка намеснік старшыні Сенату Рэспублікі Польшча Марыя Коц наведала Гродна. У межах свайго візіту яна сустрэлася з біскупам Гродзенскім Аляксандрам Кашкевічам, а таксама пабывала ў офісе Рэлігійнай місіі “Дабрачыннае каталіцкае таварыства “Карытас”” Гродзенскай дыяцэзіі.
Марыя Коц наведала былы брыгіцкi кляштар, дзе зараз вядзецца рэстаўрацыя, і драўляны лямус – самы стары драўляны будынак Беларусі, які знаходзіцца на яго тэрыторыі і ў дадзены час аднаўляецца дзякуючы датацыям Міністэрства культуры і нацыянальнай спадчыны Польшчы.
Намеснік старшыні Сенату пабывала таксама ў катэдральным касцёле св. Францішка Ксаверыя. Завітала яна і ў Сапоцкін, каб пазнаёміцца з развіццём інфраструктуры сацыяльна значных аб’ектаў на тэрыторыі дыяцэзіі, якія ў апошні час рэалізуе дабрачыннае каталіцкае таварыства “Карытас” Гродзенскай дыяцэзіі.
Дырэктар “Карытас” кс. д-р Раман Рачко правёў госцю па будоўлі Дома для састарэлых, а акрамя таго прапанаваў наведаць Дом міласэрнасці, які ўжо функцыянуе ў Сапоцкіне.
Kс. Юрый Марціновіч
