20-23 лютага ў Гродне адбыўся XVIII Міжнародны фестываль праваслаўных песнапенняў “Каложскі Дабравест”. Арганізатарамі мерапрыемства з’яўляюцца Гродзенская праваслаўная епархія і Гродзенскі аблвыканкам.
Удзел у свяце прыняў 41 свецкі і царкоўны хор з васьмі краін: Беларусі, Расіі, Украіны, Польшчы, Літвы, Латвіі, Сербіі і Румыніі. Госці давалі канцэрты і ўдзельнічалі ў конкурсных праслухоўваннях у святынях і на галоўных сцэнічных пляцоўках горада. Для калектываў-удзельнікаў была арганізавана экскурсійная праграма па знакавых гістарычных месцах Гродна.
23 лютага ў Гродзенскім абласным драматычным тэатры адбыліся ўрачысты гала-канцэрт і цырымонія ўзнагароджання пераможцаў. На гала-канцэрце прысутнічаў дапаможны біскуп Гродзенскай дыяцэзіі Юзаф Станеўскі.
Гран-пры фестываля атрымаў мужчынскі хор “Всехсвятский” прыходу ў гонар Усіх Святых у Мінску.
Фестываль запомніўся не толькі музычнай праграмай: прайшлі таксама вечары паэзіі і духоўнай музыкі, кінапаказ і іншыя мерапрыемствы.
Першы фестываль “Каложскі Дабравест” адбыўся ў 2002 г. і быў прымеркаваны да 10-годдзя адраджэння Гродзенскай епархіі. З кожным годам гэты фестываль набывае ўсё большую вядомасць. У 2011 г. Міністэрства культуры Беларусі надало яму статус міжнароднага. Ён стаў не толькі візітоўкай Гродзеншчыны, але і адным з вядучых фестываляў праваслаўных песнапенняў у свеце.
Кс. Юрый Марціновіч
Фота: orthos.org
