З 28 па 30 снежня ў кляштары cясцёр кармэлітак Дзіцяткі Езуса ў Адамавічах адбыліся чарговыя рэкалекцыі для дзяўчат, прысвечаныя тэматыцы малітвы.
Актава Божага Нараджэння – асаблівы час святочнай радасці і ўдзячнасці за дар Збаўцы. Праз канферэнцыі і размовы з сёстрамі дзяўчаты мелі магчымасць паразважаць над пытаннямі: “Як у малітве спаткаць Бога?”, “Як дазволіць весці сябе Божаму Слову па жыцці?”
Дзяўчаты пазнаёміліся з практыкай малітвы Бібліяй – Lectio Divina.
Незвычайна цікавым момантам рэкалекцый быў “досвед пустыні”, калі кожная з удзельніц мела магчымасць у цішыні і самоце ўслухоўвацца ў Божы голас.
Радасны спеў калядак і гутаркі за святочным сталом дазвалялі адчуць супольнасць адной веры і адзін дух Божага дзяцінства.
С. Ідалія ад Дзіцяткі Езуса
