У парафіяльным доме касцёла Святых Космы і Дамя’на, які год назад гасцінна адчыніў дзверы перад дзецьмі, моладдзю і іх бацькамі, віруе напоўненае радасцю, добрымі справамі і сустрэчамі жыццё. Тут кожны заняты сваёй справай. Хтосьці да дошкі прымацоўвае фотаздымкі з сумесных паездак і пілігрымак. Іншыя рэпеціруюць калядныя песні і пастаноўку.
Дарэчы, тут і кветкі расцвітаюць і ў снежні! У невялікім пакоі дзеці разам з с. Наталляй рабілі кветкі з каляровай гафрыраванай паперы і цукерак: “кветкі любові” – так яны назвалі свае вырабы.
"Вялікі букет ужо паехаў на выставу ў Віцебск, – распавядае манахіня.– Разам з моладдзю – валанцёрамі дабрачыннага таварыства “Карытас” – мы ўжо больш за месяц робім “кветкі любові”. Той, каму яе падораць, пачастуецца цукеркай, а кветачка застанецца на памяць як сімвал светлай радасці. Іх перадамо адзінокім, хворым, людзям з інваліднасцю, каб яны ведалі і адчувалі, што не адны ў гэтым свеце; што маленькі Езус, які хутка народзіцца, прыйдзе да кожнага".
"Спадзяюся, "кветкі" спадабаюцца тым, хто іх атрымае", – гаворыць адна з валанцёраў Аліса Сяржанава.
Творчым працэсам, акрамя с. Наталлі, кіравала і парафіянка Таццяна Лапшэвіч. Яна стала валанцёрам, дзякуючы прыкладу дачок Вікторыі і Юліі.
"Сустракаемся мы раз на тыдзень, а то і часцей, – адзначае жанчына. – Спраў хапае, асабліва падчас Адвэнту. Акрамя кветак з салодкім “вочкам”, для дзяцей з прытулку зрабілі яшчэ і пакрытае каляровай глазурай пячэнне".
Больш за год у астравецкім "Карытасе" "валанцёраць" брат і сястра Дзіяна і Дзяніс Юцкевічы.
"Мне падабаецца дапамагаць блізкім – і гэта я раблю не толькі ў касцёле, – дзеліцца дзяўчына. – Ад радасці іншага чалавека на душы робіцца святлей. Спадзяюся, гэтыя кветкі падораць адзінокім людзям часцінку нашай любові".
"Добрыя справы розныя бываюць. Часам добрага слова хапае, каб падняць чалавеку настрой. Адвэнт – самы час зрабіць тое, што мы адкладвалі на заўтра. Знайдзіце вольнае акенца ў сваім працоўным графіку, каб пазваніць бацькам ці адведаць іх. Пакрыўдзіліся ці кагосьці пакрыўдзілі – папрасіце прабачэння. І не шкадуйце добрых слоў, як гэтыя дзеці не шкадуюць "кветак любові" для тых, каму не хапае пяшчоты, спагады, дабрыні", - падсумоўвае валанцёр Дзяніс.
Паводле "Астравецкая праўда"
