15 верасня ў парафіі ва Уселюбе (Навагрудскі дэканат) адбылася адпустовая ўрачыстасць у гонар Святога Крыжа. У адным з найстарэйшых касцёлаў Беларусі ў гэты дзень сабраліся шматлікія парафіяне і госці.
Урачыстасці ўзначаліў кс. Андрэй Радзевіч, пробашч парафіі ў Бярозаўцы. У гаміліі святар адзначыў, што крыж дае кожнаму чалавеку надзею, а таксама становіцца шляхам духоўнага перамянення і нават умацавання.
Сваім спевам упрыгожыў адпустовую ўрачыстасць моладзевы хор “Calasanz” са Шчучына.
На заканчэнне пробашч парафіі кс. Віталій Цыбульскі падзякаваў усім, хто прыняў удзел у святкаванні.
Святыня ў вёсцы Уселюб – архітэктурны помнік пачатку XV стагоддзя, значная гісторыка-культурная каштоўнасць і важная славутасць Беларусі. Касцёл пабудаваны ў 1433 г. i з’яўляецца ў сваёй аўтэнтычнай аснове найбольш раннім узорам готыкі з вядомых на тэрыторыі Беларусі помнікаў мураванага каталіцкага храмабудаўніцтва.
Kс. Юрый Марціновіч
