Аснова кожнага свята – добра падрыхтаваная праграма, тым больш калі гэта свята дзяцей. Таму арганізатары VIII Дыяцэзіяльнага дня дзіцяці, які прайшоў 2 чэрвеня ў Гродне, падрыхтавалі для ўдзельнікаў шэраг забаўляльных мерапрыемстваў.

Вельмі добрае надвор’е паспрыяла таму, што дзеці маглі бесклапотна аддацца прыемнасцям.

Цырульніцкі салон, маляванне на тварах, творчая майстэрня, дзе дзеці маглі самастойна зрабіць паштоўкі і анёлкаў, батуты, надзіманыя горкі – толькі некаторыя з забаваў, якімі яны маглі скарыстацца.

На сцэне перад удзельнікамі свята выступіла шмат знаёмых постацяў. Артысты Гродзенскага лялечнага тэатра паказалі прадстаўленне “Прыгоды з вераб’ём Джэкам”. Штукар здолеў ператварыць голуба ў труса. А музычны гурт “Ave” Вышэйшай духоўнай семінарыі ў Гродне радаваў больш за 2 тысячы чалавек песнямі і танцамі.

Танцам і забавам не было канца. Усе разам у гэты дзень імкнуліся даць дзецям тое, што з’яўляецца найважнейшым: радасць і весялосць, і, здаецца, гэта цалкам удалося. Дзеці, поўныя ўражанняў, крыху са смуткам, бо так хутка праляцеў гэты цудоўны дзень, пакідалі прыкасцёльную тэрыторыю гродзенскай парафіі Беззаганнага Зачацця Найсвяцейшай Панны Марыі.

Aнастасія Мішкура

Фота: Вольга Сяліцкая