29 чэрвеня біскуп Гродзенскі Аляксандр Кашкевіч наведаў дзяцей, якія адпачываюць у Нецечы (Лідскі дэканат). Лагер для дзяцей з тэрыторыі дыяцэзіі па традыцыі арганізавала Рэлігійная місія “Дабрачыннае каталіцкае таварыства Caritas” Гродзенскай дыяцэзіі.
Падчас сустрэчы з біскупам дзеці распавялі ардынарыю пра тое, як праводзяць свае канікулы і чым займаюцца ў лагеры. Яны адзначылі, што гэта для іх цудоўны час сустрэчы са сваімі аднагодкамі і час паглыблення рэлігійных ведаў.
Штодня дзеці ўдзельнічаюць у св. Імшы, якая адбываецца ў парафіяльным касцёле св. Міхала Арханёла. Навучэнцы Вышэйшай духоўнай семінарыі ў Гродне рыхтуюць для дзяцей катэхезу, а таксама робяць іх дні адпачынку насычанымі разнастайнымі забавамі.
Сустрэча біскупа з дзецьмі завяршылася малітвай і ўдзяленнем пастырскага бласлаўлення.
“Caritas” Гродзенскай дыяцэзіі ўжо шмат гадоў атачае клопатам дзяцей, асабліва ў летні перыяд, арганізуючы для іх спецыяльны адпачынак. Хлопчыкам і дзяўчынкам прадстаўляецца выдатныя ўмовы, каб правесці час з карысцю для цела і душы.
Кс. Юрый Марціновіч
