Вялікая пятніца ў паўсюдным Касцёле - гэта час успаміну і рэфлексіі над судом, мукай і смерцю Езуса Хрыста. У гэты дзень не цэлебруецца св. Імша. Адбываецца набажэнства Крыжовага шляху. У касцёле не чуваць гукаў аргана і званоў. У маўчанні рухаецца працэсія ўваходу.
На завяршэнне працэсіі біскуп лажыцца крыжом каля алтара, аддаючы пашану Збавіцелю чалавецтва.
Вернікі збіраюцца на адарацыі крыжа - сімвала Божай любові і міласэрнасці - які быў закрыты заслонай з V Нядзелі Вялікага посту. Тым самым людзі выражаюць свой давер Хрысту, які спазнаў чалавечы лёс і ведае, дзе шукаць суцяшэння.
На заканчэнне Найсвяцейшы Сакрамэнт пераносяць у капліцу адарацыі, якая сімвалізуе грабніцу, дзе быў пахаваны Езус пасля ўкрыжавання. У гэтым месцы адбываецца Яго выстаўленне ў манстранцыі, накрытай празрыстым белым вэлюмам, як напамін пра саван, які ўкрываў цела Хрыста.
Сёлетнюю літургію Мукі Пана ў катэдральным касцёле св. Францішка Ксаверыя ў Гродне ўзначаліў біскуп Аляксандр Кашкевіч.
АМ,VS
