7-11 лютага ў Гродне адбыўся XVI Міжнародны фестываль праваслаўных песнапенняў “Каложскі Дабравест”. Арганізатарамі мерапрыемства з’яўляюцца Гродзенская праваслаўная епархія і Гродзенскі аблвыканкам.
У гэтым годзе ў фестывалі прыняў удзел каталіцкі хор Гродзенскай дыяцэзіі “Cantate Domino” пад кіраўніцтвам Генрыка Давідовіча. Каталіцкі хор быў адзначаны cпецыяльным прызам.
Хор выканаў на фестывалі пяць твораў, у тым ліку „Магутны Божа” Мікалая Равенскага, „Ойча наш” Станіслава Манюшкі, „Совет Превечный” Паўла Часнакова.
На фестывалі можна было пазнаёміцца з творчасцю амаль 40 харавых калектываў з Беларусі, Расіі, Польшчы, Украіны, Румыніі, Сербіі і Арменіі. Госці давалі канцэрты і ўдзельнічалі ў конкурсных праслухоўваннях у святынях і на галоўных сцэнічных пляцоўках горада.
11 лютага прафесійнае журы падвяло вынікі і ўзнагародзіла пераможцаў, адбыўся гала-канцэрт. На гала-канцэрце прысутнічаў дапаможны біскуп Гродзенскай дыяцэзіі Юзаф Станеўскі. Гран-пры фестываля атрымаў Акадэмічны хор Расійскай акадэміі музыкі імя Гнесіных (Масква).
Фестываль “Каложскі Дабравест” дае людзям унікальную магчымасць дакрануцца да скарбніцы песнапенняў за межамі сцен святыні, пазнаёміцца з малітвай, выражанай у спеве.
Цікавасць да фестываля павялічваецца з кожным годам у калектываў розных краін, што пацвярджае колькасць удзельнікаў. Мерапрыемства ўжо атрымала статус міжнароднага, з году ў год расце выканаўчае майстэрства канкурсантаў.
Фестываль запомніўся не толькі музычнай праграмай: прайшлі вечары паэзіі і духоўнай музыкі, кінапаказ і іншыя мерапрыемствы.
Першы фестываль “Каложскі Дабравест” адбыўся ў 2002 г. і быў прымеркаваны да 10-годдзя адраджэння Гродзенскай епархіі. У 2011 г. Міністэрства культуры Беларусі надало фестывалю статус міжнароднага.
Тэкст: кс. Юрый Марціновіч
