Футбольны турнір

     “Ці ж вы не ведаеце, што калі ўдзельнікі спаборніцтваў бягуць па стадыёне, бягуць усе, але ўзнагароду атрымлівае толькі адзін? Таму бяжыце так, каб вы яе атрымалі” (1, Кар 9,24)

     Спорт - гэта адна з найлепшых дарог для паканання ўсялякіх межаў (Ян Павел II). Божы Провід дазволіў, каб у гэтым годзе 26 і 27 лістапада ў чарговы раз Слонім мог прыняць каля 100 чалавек з 10 рымска-каталіцкіх парафій (гэта найбольшая колькасць удзельнікаў за ўсе гады Турніру!!!), якія былі ўдзельнікамі VI Футбольнага Турніру памяці Слугі Божага Яна Паўла II. Мэты турніру, якія імкнуцца ажыццявіць арганізатары, гэта: выхаванне праз спорт і развіццё культу Слугі Божага Яна Паўла II пасля Яго смерці, малітва аб хуткай бэатыфікацыі Слугі Божага Яна Паўла II, інтэграцыя моладзі. Як і штогод, цэнтральнай падзеяй кожнага дня была Эўхарыстыя, якую ў першы дзень Турніру ўзначаліў вікарый парафіі св. Андрэя а. Віталь Іркевіч, а з казаннем да прысутных звярнуўся а. Анатоль Ярошка, гвардыян кляштара. Ахвяраванне папярэдзіла працэсія з дарамі. Перад заканчэннем св. Імшы арганізатар кс. Артур Малафей урачыста адкрыў Турнір, зачытаўшы Прывітальны ліст Я.Экс.Кс.Біскупа Аляксандра Кашкевіча. Літургію спеваў упрыгожылі ігрой на гітары і спевам клерыкі Павел Аляскевіч і Павел Кужко.

    Пасля св. Імшы ўдзельнікі Турніру паглядзелі відэахроніку з папярэдніх Турніраў, пасля чаго адбылася жэрэб’ёўка і падзел удзельнікаў на групы. А. Віталь звярнуўся да моладзі з канферэнцыяй “Сённяшняя моладзь перад пагрозамі сучаснага свету”. Пасля духоўнага падмацавання ўдзельнікаў чакала смачнае падмацаванне для цела: як і штогод, сваю гасціннасць дарылі нам айцы капуцыны. Пасля абеду ў спартыўнай зале адбыліся спаборніцтвы, у якіх прынялі ўдзел наступныя парафіі:
- пар. Божай Міласэрнасці, Гродна-Вішнявец
- пар. Св. Андрэя Апостала, Слонім
- каманда гродзенскай дыяцэзіі
- пар. Беззаганнага Зачацця НПМ, Гродна-Паўднёвы
- пар. Св. Роха, Грандзічы-Путрышкі
- пар. НПМ Вастрабрамскай Маці Міласэрнасці, Гродна-Аўгустовак
- пар. Св. Сям’і, Ліда
- пар. Св. Тэрэсы з Авіля, Шчучын
- пар. Ліпнішкі
- пар. Сапоцкіна
    Пасля супольнай вячэры ўдзельнікі Турніру ўладкаваліся на начлег.
   Наступны дзень распачаўся Эўхарыстыяй, якую ўзначаліў пробашч парафіі св. Андрэя Апостала ў Слоніме а. Андрэй Букштан. Ён таксама звярнуўся да ўдзельнікаў Турніру з казаннем. Пася св. Імшы адбыліся фінальныя гульні і ўзнагароджванне пераможцаў. Консул Генеральнага Консульства РП у Гродне спадар Адам Хмура ад імя консульства ўручыў 10 футбольных мячоў лепшым спартоўцам з кожнай каманды, а таксама камплекты футбольнай формы для ўдзельнікаў кожнай каманды. Спонсар Баляслаў Івашка (ТАА “Вібаторг”) уручыў пераможцам медалі. На Турніры прысутнічаў кіраўнік Аддзела па справах спорту і турызму Слонімскага гарвыканкама Ляонаў Генадзь Уладзіміравіч. Кожны ўдзельнік спаборніцтваў атрымаў падарункі ад спонсараў Турніру. Закончыўся гэты дзень Турніру супольным абедам.

9-10 месца - Ліпнішкі 6:1 Сапоцкіна
7-8 месца Шчучын 3:1 Гродна-Вішнявец
5-6 месца Слонім св. Андрэя  2:1 Гродна-Аўгустовак
3-4 месца зборная гродзенскай дыяцэзіі 5:2 Грандзічы-Путрышкі
1-2 месца Ліда св. Сям’і 7:3 Гродна-Паўднёвы

    Найлепшы брамнік - Ягор Біліда (Гродна-Паўднёвы).
    Найлепшы спартовец - Сяргей Балабанаў (зборная гродзенскай дыяцэзіі).
    Найбольш забіў галоў Валерый Таранда (Ліда св. Сям’і).

Міхаіл Малчанаў (Шчучын)
Аляксандр Аляскевіч (зборная гродзенскай дыяцэзіі)
Вадзім Спасюк (Слонім, св. Андрэя)
Юрый Каліберда (Гродна-Паўднёвы)
Яўген Дзянішчык (Гродна-Вішнявец)
Ілля Козак (Ліда, Св. Сям’і)
Віталь Зайкоўскі (Гродна-Аўгустовак)
Андрэй Адаська (Грандзічы-Путрышкі)
Сяргей Федаровіч (Ліпнішкі)
Андрэй Севасцьяновіч (Сапоцкіна)

Словы падзякі суддзям: Яўгену Сакалоўскаму, Аляксандру Кадоўбіку, Максіму Федарчуку.