7 мая біскуп Аляксандр Кашкевіч наведаў Вялікую Бераставіцу, каб удзяліць сакрамант канфірмацыі шматлікім вернікам як мясцовай парафіі, так і з парафіі святога Антонія Падуанскага ў Малой Бераставіцы.
Сакрамант канфірмацыі - гэта сакрамэнт хрысціянскай сталасці. Праз яго чалавек атрымлівае дары Святога Духа, якія ўзмацняюць яго сувязь з Касцёлам, больш цесна ўключаюць у хрысціянскую супольнасць і дапамагаюць сведчыць пра сваю веру і словамі, і ўчынкамі.
Той, хто прымае гэты сакрамант, павінен стаць сапраўдным вучнем Хрыста, які не саромеецца сваёй веры і не баіцца абараняць яе. Моладзь і дарослыя на працягу года старанна рыхтаваліся да гэтай важнай падзеі ў сваім жыцці, на ўрачыстую св. Імшу, якую ўзначаліў бп. Аляксандр, прыбыло шмат вернікаў і святары з дэканата.
На пачатку набажэнства ардынарыя шчыра прывіталі самыя маленькія вернікі з Вялікай Бераставіцы, моладзь і дарослыя выказалі ўдзячнасць за магчымасць атрымаць адзін з галоўных сакрамантаў. Іерарх падзякаваў за сардэчны прыём і запрасіў усіх да супольнай малітвы за тых, хто рыхтуецца прыняць дары Cвятога Духа.
Кандыдаты перад прыняццем сакраманту канфірмацыі аднавілі свае прысягі хросту і звярнуліся з просьбай да біскупа аб удзяленні сакраманту Святога Духа. Разам са сваімі сведкамі яны падыходзілі да біскупа і праз ускладанне рук і намашчэнне хрызмам атрымлівалі незнішчальны знак вызнаўцаў Хрыста. Біскуп А. Кашкевіч выказаў радасць, што "праз сакрамант хрысціянскай сталасці парафія ўзбагацілася новымі рыцарамі арміі Хрыстовай, і прыпомніў маладым людзям аб тым, што дзе б яны ні былі, усюды павінны даваць сведчанне сваёй веры".
Ён падзякаваў усім, хто падрыхтаваў гэтую ўрачыстасць, і адзначыў, што святыня ў Вялікай Бераставіцы значна змянілася за апошнія гады, стала больш прыгожай дзякуючы клопатам ксяндза-пробашча а. Вальдэмара Слоты.
- Але галоўнае, што яна не пустуе, тут шмат моладзі і дарослых вернікаў, цудоўны хор і прыкладная літургічная служба, - адзначыў іерарх.
Біскуп пажадаў усім быць моцнымі ў веры і заўсёды аддаваць сябе пад апеку Найсвяцейшай Маці, якую Касцёл асаблівым чынам ушаноўвае ў маі.
На заканчэнне св. Імшы тыя, хто атрымаў сакрамант духоўнай сталасці, выказалі ўдзячнасць усім, хто дапамагаў ім падрыхтавацца да прыняцця дароў Святога Духа, і паабяцалі быць годнымі сведкамі Уваскрослага Хрыста і жывым Евангеллем для іншых людзей.
Падрыхтавала Ірына Міклаш
