“Ніхто не мае большай любові за тую, калі хто аддае жыццё сваё за сваіх сяброў”, - такімі словамі 31 ліпеня ў 17:00 вечара кс. біскуп Аляксандр Кашкевіч распачаў св. Імшу ва ўспамін чарговай гадавіны мучаніцкай смерці сясцёр-назарэтанак з Навагрудка, расстраляных нямецкімі фашыстамі ў 1943 годзе.
Св. Імша ў гонар пакутніц была адпраўлена ў месцы іх пакарання – у Батароўсікм лесе. Падчас гаміліі біскуп Аляксандр назваў гэтае месца “страшным, але адначасова святым”. Страшным, таму што ў гэтым лесе здзейснілася жахлівае злачынства, якое адабрала жыццё 11 бязвінных манахінь. Святым, таму што смерць сясцёр была іх дабравольнай ахвярай у жэсце любові да Бога і бліжняга. Сёстра Стэлля і яе паплечніцы згодна са сваёй воляй пайшлі на расстрэл, каб выратаваць жыццё арыштаваных жыхароў Навагрудка.
Ужо шосты год запар у с.в Імшы ў гонар мучаніц удзельнічаюць паломнікі з пілігрымкі “Гродна-Навагрудак”. У гэтым годзе адметнай стала таксама прысутнасць на св. Імшы паломнікаў з першай у гісторыі Беларусі пілігрымкі “Новая Мыш-Навагрудак”. Паводле склаўшайся традыцыі пілігрымы штогод кладуцца крыжом на месцы расстрэлу сясцёр, каб выразіць ім пашану і даручыць свае просьбы.
Сярод высокіх гасцей падзякаваць сёстрам за сведчанне гераічнай любові прыбылі таксама біскуп Пінскай дыяцэзіі Антоні Дзям’янка, Генеральны консул РП у Гродне Анджэй Хадкевіч, прадстаўнік аддзела культуралогіі ў Навагрудку Іна Тадэвушаўна Талочка і настаяцельніца навагрудскага манастрыа с. Ляўра.
Напрыканцы св. Імшы, звярнуўшыся да прысутных, галоўны цэлебрант св.Імшы адзначыў, што праз ахвяру сясцёр людзі павінны зразумець адну галоўную рэч: “годнасць чалавека ніколі не можа быць растаптана ані страхам, ані ненавісцю, ані нават смерцю”.
Набажэнствы з нагоды 72-ой гадавіны мучаніцкай смерці сясцёр-назарэтанак завяршыліся св. Імшой у фарным касцёле Навагрудка 1 ліпеня ў 4:30 раніцы – прыкладную гадзіну расстрэлу манахінь.
Ангеліна Марцішэўская
Фота: Вольга Сяліцкая
