Выпускнікі Гродзенскай семінарыі праводзяць супольную сустрэчу (абноўлена)

09 Кастрычніка 2012

Сустрэча былых семінарыстаў Гродзенскай ВДС, якія паступілі ў семінарыю ў 1990 годзе, адбываецца ў Гродне 9-11 кастрычніка. “Вярнуліся мы, першыя клерыкі гэтай семінарыі, да крыніцы, з якой чэрпалі веды ад настаяцеляў і выхавацеляў, прыклад веры – ад жыхароў Гродзеншчыны. Сустрэча курсу сабрала нас, каб нанава адкрыць Хрыста, каб нас больш прыцягвала Яго таямніца, каб больш прагнуць Яго шукаць”, - распавёў кс. прэлат Юзаф Станеўскі, рэктар Гродзенскай ВДС, былы першакурснік семінарыі 1990 года паступлення.

Св. Імшу падзякі святары, былыя клерыкі, будуць цэлебраваць падчас сустрэчы за кс. аб-па Тадэвуша Кандрусевіча, кс. біскупа Аляксандра Кашкевіча, за ксяндзоў прафесараў і выхавацеляў, манаскіх сясцёр і за свецкіх асоб. Літургію для першых выпускнікоў 10 кастрычніка будзе праводзіць кс. прэлат Вінцэнт Лісоўскі, першы пракуратар семінарыі, Божае Слова скажа а. д-р Анджэй Шчупал CSsR, які калісьці праводзіў для клерыкаў першыя рэкалекцыі. Разам са сваімі гадаванцамі пры алтары будуць маліцца кс. праф. Юры Левінскі, кс. праф. Люцыян Радомскі, кс. праф. Тадэвуш Вышыньскі, кс. праф. Раман Катлімоўскі.

У малітвах былыя клерыкі будуць таксама згадваць тых, хто “праводзіў нас у пілігрымцы веры і адышоў па ўзнагароду да Пана” – памерлых святароў прафесараў, манаскіх сясцёр, асоб свецкіх. У гэты ж дзень святары наведаюць гродзенскія могілкі, каб памаліцца пры магіле сп. кс. прэлата Міхала Варанецкага, духоўнага айца семінарыстаў, кс. інфулата Міхала Арановіча, спаведніка, і сястры Францішкі Марыі Занеўскай з супольнасці сясцёр назарэтанак.

Таксама ў праграме святароў наведаць могілкі ў Гожы, каб памаліцца за сп. кс. Антонія Самілу, аднаго з першых студэнтаў Гродзенскай семінарыі. Былыя клерыкі наведаюць парафію св. Ганны ў Лунна, дзе сустрэнуцца з кс. Люцыянам Радомскім. У шэрагах парафій, якія наведаюць святары, служаць былыя першакурснікі 1990 года: парафія Св. Сям’і ў Лідзе, дзе пробашчам служыць кс. Юзаф Ганьчыц, парафія Адшукання Святога Крыжа ў Жырмунах, пробашч кс. Ян Залога, парафія Святога Яна Хрысціцеля ў Беняконях, пробашч кс. Станіслаў Лабан.

Сустрэча святароў, першых клерыкаў Гродзенскай духоўнай семінарыі, завершыцца 11 кастрычніка.

Выпуск студэнтаў Гродзенскай семінарыі, якія паступілі ў 1990 годзе, налічваў 21 чалавек

Першы выпуск святароў Гродзенскай Вышэйшай Духоўнай Семінарыі

Дыяканскія Святарскія Дыяцэзія

пасвячэнні пасвячэнні

Бародзіч Андрэй - 08.12.1994 08.06.1996 Гродзенская

Халяўкін Павел - 17.06.1995 21.12.1995 Пінская

Ганьчыц Юзаф - 08.12.1994 17.06.1995 Гродзенская

Клімантовіч Антоній 08.12.1994 09.07.1995 Мінска-Магілёўская

Крэміс Ян - 08.12.1994 07.12.1996 Мінска-Магілёўская

Квапіш Леон - 27.12.1994 24.06.1995 пам. 25.06.2009 (Украіна)

Лабан Станіслаў - 17.06.1995 14.06.1997 Гродзенская