З 28 па 30 лістапада пры гродзенскім рэктаральным касцёле Звеставання Найсвяцейшай Панне Марыі прайшлі рэкалекцыі, якія праводзіла душпастырства цвярозасці Гродзенскай дыяцэзіі.
У рэкалекцыях удзельнічалі тыя, каго клапоціць праблема цвярозасці ў сваіх сем’ях або наогул у беларускім народзе і краіне. Духоўныя практыкаванні давалі магчымасць памаліцца аб цвярозасці ў сем’ях, а таксама за ўсіх, хто мае алкагольную, наркатычную ці іншыя залежнасці, каб з Божай дапамогай яны маглі іх пераадолець.
Святую Імшу, якой распачаліся рэкалекцыі, цэлебраваў біскуп Гродзенскі Уладзімір Гуляй. У гаміліі біскуп назваў гэтыя рэкалекцыі “момантам праўды і надзеі, момантам, калі мы ўсе – пастыры, аніматары, бацькі і дзеці, людзі, якія праходзяць дарогу вызвалення з залежнасці, і іх сябры – стаім перад Богам як адна сям’я, якую Езус хоча ўзняць, умацаваць і аздаравіць”.
“Кожны з нас ведае: залежнасці – гэта не слабасць аднаго чалавека. Гэта рана цела Касцёла, рана грамадства і часта рана сям’і. Гэта боль, які не становіцца меншым, калі пра яго маўчаць. Гэта крыж, які многія нясуць у адзіноце. Але мы сабраліся тут таксама таму, што верым: Хрыстус мацнейшы за любую цемру, за любую залежнасць”, – сказаў іерарх.
“Залежнасць – гэта не канец гісторыі, – дадаў біскуп. – Езус – Пан той хвіліны, калі сэрца чалавека кажа: “Хачу пачаць нанова”. Езус прайшоў праз спакусы, праз боль, праз адзіноту, праз чалавечую слабасць. Ён ведае, што такое ўнутраны бой. Таму Ён можа вызваліць”.
Звяртаючыся да ўдзельнікаў рэкалекцый, іерарх заўважыў: “Вы добра ведаеце, колькі патрэбна мужнасці, каб прыйсці сюды. Устаць. Прызнаць, што ёсць праблема.
Прасіць Бога дапамагчы. Многія людзі ідуць па лёгкай дарозе: робяць выгляд, што ўсё добра, падмятаюць пад дыван, хлусяць сабе. Вы – не. Вы выбралі праўду. А праўда заўсёды лечыць”.
Біскуп адрасаваў тым, хто змагаецца са сваёй залежнасцю, наступныя словы: “Бог бачыць твой боль. Нават калі ты сам ужо не разумееш сябе, Бог разумее. Ты не з’яўляешся сваёй залежнасцю. Ты – не алкаголь, не наркотык, не гульня, не рана. Ты – Божае дзіця. Ты можаш пачаць нанова, нават сто разоў. Езус не ставіць умовы: “Я дапамагу табе, калі ты будзеш ідэальным”. Езус кажа: “Я з табой. Пачнём зноў”. Бог не глядзіць на цябе з вышыні. Ён глядзіць на тваё сэрца. І бачыць там тое, што здольнае ззяць, нават калі іншыя гэтага не бачаць. Ты не адзін. Тут ёсць супольнасць. Тут ёсць людзі, якія прайшлі праз такое ж. Тут ёсць святары, якія гатовыя слухаць. Тут ёсць Бог, які не здрадзіць”.
Святароў біскуп заахвоціў “прымаць, слухаць, не асуджаць, суправаджаць, умацоўваць людзей на шляху слабасці”. Па словах іерарха, у душпастырстве цвярозасці святарам патрэбны “тры ключы”: цярпенне (“Чалавек падае. І часта падае шмат разоў. Але пастыр не можа стамляцца. Наша трываласць – для многіх апошні масток над безданню”), слуханне (“Часам адна размова ратуе жыццё. Калі чалавек можа выліць свой боль – гэта ўжо палова вызвалення”) і малітва (“Святар не павінен быць “гіперактыўным псіхолагам”. Святар павінен быць чалавекам малітвы. Бо залежнасць – гэта не толькі псіхалогія, гэта таксама духоўная рана, духоўны бой. Толькі Бог лечыць глыбока. Толькі Хрыстус – сапраўдны вызваліцель”).
Членам сем’яў, у якіх існуе праблема залежнасці, іерарх сказаў: “Вы часта самыя стомленыя. Вы ў ценю гэтай барацьбы. Вы тыя, каго часта раняць словы, крык, абяцанні, якія не спраўдзіліся. Прашу вас аб адной рэчы: аддзяліце чалавека ад залежнасці. Любіце чалавека. Ненавідзьце залежнасць. Не блытайце гэтыя рэчы. Часта сям’я можа стаць яслямі, дзе Бог зноў нараджае надзею”.
Тым, хто змагаецца з залежнасцю, біскуп даў наступныя парады: “Устань. Нават калі стаў цяжка. Нават калі няма сіл. Езус бярэ за руку. Ідзі. Не стой на месцы. Маленькі крок — таксама крок. Не бойся. Бог мацнейшы за любую залежнасць, мацнейшы за любы сорам, мацнейшы за любое падзенне”.
У межах рэкалекцый быў час для адарацыі Найсвяцейшага Сакрамэнту, магчымасць прыступіць да споведзі і падзяліцца сваім досведам. Акрамя таго, выступіў з канцэртам гурт Міждыяцэзіяльнай вышэйшай духоўнай семінарыі ў Гродне “Ave”.
Прэс-служба Гродзенскай дыяцэзіі
