Біскуп Гродзенскі Уладзімір Гуляй, адказны пры Канферэнцыі Каталіцкіх Біскупаў у Беларусі за душпастырства моладзі, прысутнічаў на Юбілеі моладзі, які праходзіў у Рыме. Пасля завяршэння гэтай сустрэчы біскуп выказвае падзяку ўсім, хто прадстаўляў на ёй Касцёл у Беларусі, і ўсім, хто садзейнічаў удзелу беларусаў у ёй.
Дарагія браты ў святарстве, дыяканы, кансэкраваныя асобы, семінарысты, дарагая моладзь, сябры!
З глыбіні майго біскупскага сэрца выказваю шчырую падзяку кожнаму і кожнай з вас за ўдзел у Юбілейнай сустрэчы моладзі ў Рыме, якая адбылася з 28 ліпеня па 3 жніўня 2025 года, за малітву, падтрымку і адкрытасць сэрцаў падчас гэтай сустрэчы.
Як адказны за душпастырства моладзі пры Канферэнцыі Каталіцкіх Біскупаў у Беларусі хачу асабліва падзякаваць усім, хто дапамог моладзі нашай краіны адгукнуцца на Божы заклік — стаць пілігрымамі надзеі.
Дзякую дарагім біскупам за падтрымку і благаслаўленне, прэзбітэрам і дыяканам — за суправаджэнне, сведчанне і служэнне, законным сёстрам — за малітву і матчынае сэрца, іншым кансэкраваным асобам — за духоўную моц і надзею, а таксама — з вялікай радасцю — дзякую студэнтам семінарыі ў Гродне, якія разам з іншай моладдзю сведчылі пра жывое сэрца Касцёла і пра гатоўнасць служыць Богу і людзям.
Асаблівая падзяка вам, дарагія юнакі і дзяўчаты, якія з запалам, верай і гатоўнасцю прадстаўлялі Беларусь у сэрцы Паўсюднага Касцёла. Вашае сведчанне — гэта надзея на будучыню. Дзякую за вашу малітву, радасць, сведчанне еднасці з Папам і моладдзю з усяго свету.
Памятаю і пра ўсіх людзей добрай волі, якія дапамагалі ў падрыхтоўцы паездкі на гэтую сустрэчу і суправаджэнні ўдзельнікаў, ахвяроўвалі час, сілы, сродкі, каб зрабіць гэтае падарожжа магчымым.
Дзякуй вам за кожны крок, за кожную малітву, за кожнае «так», сказанае Богу.
Няхай Пан шчодра ўзнагародзіць усіх, хто адкрыў сэрца, каб служыць моладзі і Касцёлу!
Няхай ваша вера будзе моцнай, надзея — жывой, а любоў — дзейснай!
З любоўю і благаслаўленнем,
Ваш біскуп Гродзенскі Уладзімір
Адказны за душпастырства моладзі пры ККББ
