З 20 па 26 ліпеня ў кляштары Кангрэгацыі Сясцёр Найсвяцейшай Сям’і з Назарэта ў Наагрудку прайшлі рэкалекцыі для сем’яў пад назвай “Хаджэнне ў любові”.
Духоўныя практыкаванні праводзілі пробашч парафіі Найсвяцейшай Тройцы ў Глыбокім (Віцебская дыяцэзія) кс. Міхалай Ціхановіч і сёстры назарэтанкі.
Удзельнікамі былі сем’і з тых месцаў Беларусі, дзе дзейнічае Асацыяцыя Святой Сям’і. Сужэнцы прыбылі разам з дзецьмі.
Прысутныя разважалі над пытаннямі, сярод якіх наступныя: “Што значыць любіць?”, “Што перашкаджае мне любіць?”, “У чым праяўляецца любоў?”, “Ці ўмяю я любіць сябе?”
Вельмі каштоўнымі для сябе ўдзельнікі называюць сустрэчы ў групах, на якіх дзяліліся досведам любові, узаемаадносін, прабачэння. Вечары праходзілі ў радаснай атмасферы, прысутныя адзначаюць, што кожны вечар “быў непаўторным”. Важным пунктам праграмы рэкалекцый была адарацыя Найсвяцейшага Сакрамэнту, якая давала магчымасць будаваць адносіны з Богам.
Акрамя таго, на гэтых рэкалекцыях да Асацыяцыі Святой Сям’і далучылася сям’я Дзмітрыя і Наталлі Вавінскіх.
Прэс-служба Гродзенскай дыяцэзіі
