16 сакавіка, у Другую нядзелю Вялікага посту, у парафіі Адведзінаў Найсвяцейшай Панны Марыі ў Тракелях, дзе знаходзіцца дыяцэзіяльны санктуарый Маці Божай Каралевы нашых сем’яў (Радунскі дэканат), прывіталі новага пробашча і кусташа.
Ім стаў кс. Уладзіслаў Сурвіла, якога прызначыў на гэтыя пасады біскуп Гродзенскі Уладзімір Гуляй. Ранейшы пробашч тракельскай парафіі і кусташ санктуарыя, кс. канонік Юрый Бяганскі, прызначаны на месца ранейшага служэння ксяндза Сурвілы – пробашчам парафіі Найсвяцейшай Тройцы ў Войстаме і адміністратарам парафіі Найсвяцейшай Тройцы ў Данюшаве (Смаргонскі дэканат).
Увядзенне новага кусташа і пробашча на пасаду здзейсніў дэкан Радунскага дэканату кс. канонік Генрык Яблонскі.
Пры ўваходзе ў тракельскі касцёл ксяндза Сурвілу сустрэлі з хлебам і соллю парафіяне. Ён прынёс урачыстую прысягу верна выконваць абавязкі пробашча і кусташа, прамовіў малітву Credo.
У сваім першым звароце да парафіян ён сказаў, што будзе прыкладваць намаганні, каб святыня i яе наваколле прыцягвалі сваёй прыгажосцю не толькі мясцовых жыхароў, але і людзей з іншых месцаў. Таксама ён заахвоціў парафіян супольна ісці шляхам збаўлення, які паказаў Хрыстус, і папрасіў маліцца за яго, каб ён стаў для іх добрым і руплівым душпастырам, які любіць кожнага вернікa.
Прэс-служба Гродзенскай дыяцэзіі
