16 сакавіка жыхарка вёскі Песлі Браніслава Дзіўнель адзначыла стогадовы юбілей. У гэты дзень да яе завіталі прадстаўнікі дабрачыннага каталіцкага таварыства “Caritas” Гродзенскай дыяцэзіі і Гродзенскага раённага тэрытарыяльнага цэнтра сацыяльнага абслугоўвання насельніцтва.
Госці не толькі прынеслі ўрачыстыя віншаванні і падарункі, але і выказалі цёплыя словы падтрымкі.
“Сто гадоў – цэлая эпоха, напоўненая гісторыямі, вопытам і момантамі шчасця, – адзначаюць яны. – Браніслава Іосіфаўна – жывы прыклад таго, як захаваць аптымізм, дабрыню і веру нават у самых складаных абставінах, прыклад мудрага жыцця з яго выпрабаваннямі.
Візіт прадстаўнікоў “Caritas” і Цэнтра сацыяльнага абслугоўвання насельніцтва – яскравы прыклад таго, як грамадства можа аб’ядноўвацца вакол такіх значных падзей. Гэта не проста ўвага да пажылога чалавека, але і важны знак пашаны і дабрыні, бо кожны з нас варты павагі і ўдзячнасці, незалежна ад узросту”.
Прэс-служба Гродзенскай дыяцэзіі
