19 студзеня студэнты прапедэўтычнага курса Міждыяцэзіяльнай вышэйшай духоўнай семінарыі ў Гродне наведалі санктуарый Езуса Журботнага ў Росі (Ваўкавыскі дэканат).
Гэты санктуарый знаходзіцца ў шэрагу святынь, якія ў межах Юбілейнага 2025 года біскуп Гродзенскі Уладзімір Гуляй устанавіў юбілейнымі: пры іх наведванні ўдзяляецца поўны адпуст.
У санктуарыі семінарысты прыслугоўвалі на святой Імшы, а таксама пазнаёміліся з вернікамі і міністрантамі парафіі. Семінарысты прапанавалі ім падумаць над тым, каб пайсці шляхам святарскага паклікання, заахвоцілі іх маліцца за семінарыю і прасіць Бога аб новых работніках для Яго жніва.
Пасля літургіі кусташ санктуарыя кс. канонік Чэслаў Паўлюкевіч запрасіў гасцей на гарбату. Паміж студэнтамі і кусташам адбылася шчырая размова аб семінарыйным быце, тым, як семінарысты вучацца і якія ў іх прадметы.
Госці павіншавалі ксяндза Чэслава з днём нараджэння, які ён святкаваў 16 студзеня, пажадаўшы яму Божых ласкаў на далейшым шляху святарскага служэння.
Яраслаў Булко, прэс-служба Гродзенскай дыяцэзіі
