27-28 снежня ў Шчучыне прайшоў дзень засяроджання для дзяўчат з гродзенскай парафіі Святога Духа, праведзены сёстрамі святой Ядвігі.
На сустрэчы разважалі пра асобу маавіцянкі Рут – гераіні аднайменнай кнігі Старога Запавету і адной з тых, хто ўваходзіў у радавод Езуса Хрыста, якая дзякуючы сваёй вернасці стала часткай Божага плану і атрымала ва ўзнагароду веру ў адзінага Бога.
Удзельніцы сустрэчы маглі паглыбіць не толькі свае веды наконт радаводу Езуса, але найперш сваё духоўнае жыццё. Важнай часткай сустрэчы была адарацыя, на якой кожны меў магчымасць адчуць блізкасць Бога, пазнаць сваю непаўторнасць і важнае месца ў Божым Провідзе. Як заўсёды, цэнтральным момантам была святая Імша.
Сустрэча ўключала не толькі духоўныя практыкі: дзяўчаты маглі адпачыць і павесяліцца, абмяняцца думкамі і ідэямі, якія іх натхнілі і дапамаглі адчуць адзінства і сяброўства з Богам і паміж сабой.
“Спадзяёмся, што прыклад Рут зможа натхніць кожнага з нас на новыя справы і на тое, каб поўнасцю даверыць сваё жыццё Богу”, – кажуць арганізатары дня засяроджання.
Прэс-служба Гродзенскай дыяцэзіі
