Біскуп Кашкевіч падзяліўся аплаткай з удзельнікамі малітоўнага руху “Маргарытка”

14 студзеня ў будынку Вышэйшай духоўнай семінарыі ў Гродне прайшла аплаткавая сустрэча для малітоўнага руху “Маргарытка”.

У капліцы семінарыі сабраліся шматлікія ўдзельнікі руху. Яны штодзённа спадарожнічаюць святарам сваімі малітвамі і ахвярамі, а таксама прымаюць дабравольны пост у іх інтэнцыі, разумеючы важнасць справы, якую выконваюць, і дапамагаючы адчуць адзінства, цеплыню, адказнасць адзін за аднаго.

У пачатку сустрэчы адбылася святая Імша, якую ўзначаліў біскуп Гродзенскі Аляксандр Кашкевіч. Гамілію прамовіў мадэратар малітоўнага руху кс. Ян Раманоўскі.

Біскуп падзякаваў удзельнікам руху “Маргарытка” за здзяйсненне іх вялікай задачы. Пастыр Касцёла на Гродзеншчыне падкрэсліў, што іх малітва садзейнічае асвячэнню духавенства і рэалізацыі місіі, да якой святары былі пакліканы.

Падчас дзялення аплаткамі, якое адбывалася ў зале Яна Паўла ІІ, у цёплай сямейнай атмасферы было выказана шмат прыемных пажаданняў, як у сапраўднай сям’і, дзе клопат пра кожнага, любоў і міласэрнасць да бліжняга з’яўляюцца неабходнай умовай жыцця.

Такія сустрэчы фарміруюць сапраўдныя хрысціянскія каштоўнасці, дзякуючы якім праўда Хрыста трыўмфуе на зямлі і аб’ядноўвае людзей для пошукаў сапраўдных скарбаў, для распаўсюджвання ўзаемападтрымкі і любові і для духоўнай сувязі вернікаў і душпастыраў.

Прэс-служба Гродзенскай дыяцэзіі

Фота: Станіслаў Бервячонак