З 5 па 7 студзеня, падчас зімовых канікул, у Вышэйшай духоўнай семінарыі ў Гродне адбыліся рэкалекцыі для юнакоў і міністрантаў “Малітва ў маім жыцці”.
У духоўных практыкаваннях удзельнічалі маладыя людзі з розных месцаў Гродзенскай дыяцэзіі.
Рэкалекцыі распачаліся вячэрняй святой Імшой у капліцы семінарыі, якую ўзначаліў рэктар кс. канонік Віталь Вайцяхоўскі.
Рэкалекцыі давалі магчымасць засяродзіць увагу на асабістай малітве, у чым дапамагалі духоўны айцец семінарыі кс. Ян Сарэла, кс. Павел Скуба, кс. Ян Раманоўскі.
Удзельнікі рэкалекцый наведалі гродзенскую парафію Маці Божай Анёльскай. Брат Павел OFM арганізаваў для іх цікавую экскурсію і пазнаёміў з гісторыяй касцёла. Таксама яны пабывалі ў катэдральнай базыліцы св. Францішка Ксаверыя, дзе перад цудадзейным абразом Маці Божай Кангрэгацкай узнеслі малітвы да Найсвяцейшай Панны Марыі.
Духоўныя практыкаванні скончыліся ў нядзелю Хросту Пана ўрачыстай Эўхарыстыяй у катэдральным касцёле. Перад развітаннем кс. Ян Сарэла благаславіў кожнага з удзельнікаў у добры шлях да родных парафій.
Дні, праведзеныя ў семінарыі, сталі для маладых людзей добрай нагодай да далейшага ўмацавання сваіх адносін з Богам.
Максім Ленец
