1 кастрычніка парафіяльная супольнасць св. Яна Хрысціцеля ў Васілішках (Шчучынскі дэканат) адзначала адпустовую ўрачыстасць Арханёла Міхала. Парафію наведаў арцыбіскуп эмерыт Тадэвуш Кандрусевіч.
Арханёл Міхал з’яўляецца асаблівым апекуном манаскай кангрэгацыі айцоў міхалітаў, якія на працягу некалькіх гадоў служаць у гэтай парафіяльнай супольнасці.
Арцыбіскупа прывітаў пробашч парафіі кс. Станіслаў Пытэль CSMA. Святар назваў вялікай радасцю візіт заслужанага іерарха ў той дзень, калі парафія ўшаноўвае Арханёла, якога мае апекуном Каталіцкі Касцёл на Беларусі.
Арцыбіскуп нагадаў у гаміліі на ўрачыстай Імшы гісторыю грэхападзення анёлаў на чале з Люцыферам і перамогу над імі Арханёла Міхала з яго славутым воклічам “Хто ж, як не Бог!”. У выніку Люцыфер замест таго, каб быць носьбітам святла, аб чым кажа яго імя, стаў носьбітам грахоўнай цемры, а Арханёл Міхал – сімвалам перамогі дабра над злом.
Таксама іерарх нагадаў, што, паводле легенды, Бог стварыў чалавека ўзамен анёлаў пасля іх падзення. Таму, дадаў ён, чалавек павінен быць падобным да анёлаў і праслаўляць Бога сваім жыццём, аднак замест гэтага паддаецца спакусе д’ябла і чыніць злыя справы. У сувязі з гэтым арцыбіскуп прывёў словы апостала Паўла: мы ведаем, што такое добро, а чынім зло.
Іерарх падкрэсліў, што нашы продкі ў часы ганенняў на Касцёл мужна баранілі веру. Сёння ж, калі абставіны іншыя, калі не забараняецца верыць і дэманстраваць веру, людзі дабравольна адмаўляюцца ад яе, адзначыў ён. Арцыбіскуп дадаў, што месца Бога займаюць матэрыяльныя каштоўнасці, амаральныя прыемнасці, алкаголь, наркотыкі; што сям’я і Божы дар жыцця перажываюць вялікі крызіс; што “замест культуры жыцця прапагандуецца культура смерці”, а “высілкі па ўсталяванні сталага міру разбіваюцца без маральных каштоўнасцяў, як марскія хвалі аб скалы”.
Па словах арцыбіскупа, у такой сітуацыі трэба вярнуцца да воклічу Арханёла Міхала: “Хто ж, як не Бог!” Іерарх заклікаў вернікаў паставіць Бога ў цэнтры свайго жыцця. Жыццё без Бога не мае ніякай перспектывы, а калі Ён будзе на першым месцы, то і ўсё іншае будзе на сваім, адзначыў арцыбіскуп Кандрусевіч.
Прэс-служба Гродзенскай дыяцэзіі
Фота: кс. Павел Эйсмант
