3 8 па 12 жніўня ў парафіі св. Станіслава ў вёсцы Ляцк (Шчучынскі дэканат) быў арганізаваны летні лагер для дзяцей “Канікулы з Богам”.
Гэтыя канікулы прайшлі ў парафіі ўжо ў пяты раз. На працягу пяці гадоў яны традыцыйна праводзяцца ў жніўні, i дзеці чакаюць іх з нецярпеннем, бо для ix гэты час вельмі цікавы i пазнавальны. На канікулах яны могуць набыць новых сяброў, пагуляць у цікавыя гульні, правесці час разам з Панам Богам, удзельнічаючы ў святой Імшы i катэхетычных занятках, якія сёлета правёў пробашч парафіі кс. Уладзімір Аксенцьеў.
На працягу пяці дзён хлопчыкі і дзяўчынкі паглыблялі свае веды пра Бога. Кожны дзень канікул прысвячаўся пэўнай тэме.
У першы дзень увага дзяцей была засяроджана на Бібліі, на тым, што гэта такое і што яна гаворыць пра Хрыста. Мэтай другога дня было данесці да дзяцей думку, што Хрыстус любіць ycix людзей. У трэці дзень дзеці пазнаёміліся з прыпавесцю “пра сто i адну згубленую авечку”, праз якую ім было патлумачана, што Хрыстус – Добры Пастыр, які любіць сваіх авечак i ніколі нікога не пакіне, нават калі хтосьці згубіцца, а заўсёды знойдзе яго i дапаможа. Мэтай чацвёртага дня было паказаць маленькім парафіянам, што Хрыстус – іх найлепшы сябар, які ведае кожнага чалавека па імені (прыкладам стала біблейская гісторыя пра Закхея). У апошні дзень разважалі аб тым, што Хрыстус – наш Збаўца.
На святых Імшах у межах “Канікул з Богам” амаль кожнаму дзіцяці была дадзена магчымасць паспрабаваць сябе ў ролі міністранта, што выклікала ў іх незвычайнае захапленне i радасць. На Эўхарыстыі кожны з дзяцей быў задзейнічаны – яны спявалі, прамаўлялі літургічныя чытанні і г.д., – што дазволіла ім адчуць сябе адказнымі, важнымі, дарослымі, а галоўнае – па-сапраўднаму шчаслівымі.
З дапамогай аніматараў на працягу пяці дзён праводзіліся розныя цікавыя, пазнавальныя гульні. Прыемным дапаўненнем быў штодзённы салодкі стол, які арганізоўваў пробашч.
Апошні дзень “Канікул з Богам” быў асаблівым. Быў арганізаваны вечар ля вогнішча, калі дзеці гулялі і спявалі. Іх твары ўпрыгожвалі не толькі шчаслівыя ўсмешкі, але і аквагрым: у кожнага быў намаляваны малюнак, які ён хацеў. Кожнае дзіця атрымала не толькі радасныя эмоцыі, але i каштоўны памятны падарунак ад пробашча.
Ксёндз Уладзімір Аксенцьеў вельмі пастараўся, каб летні лагер запомніўся маленькім парафіянам надоўга. Заахвоціць дзяцей, каб яны наведвалі касцёл, імкнуліся пазнаваць Хрыста i былі з Ім на працягу ўсяго жыцця, дапамагчы ім стаць сапраўднымі хрысціянамі, паказаць ім, як цудоўна жыць з Панам Богам, – такія мэты мелі канікулы.
Прэс-служба Гродзенскай дыяцэзіі
