У І нядзелю Вялікага посту навучэнцы 3 і 4 курсаў Гродзенскай вышэйшай духоўнай семінарыі прынялі паслугі акалітату і лектарату. Гэтаму папярэднічалі велікапосныя рэкалекцыі ў ВДС. А падчас ранішняй літургіі 26 лютага алюмны 5 курса былі далучаны да ліку кандыдатаў да дыяканства і святарства. Паслугі лектарату і акалітату навучэнцы семінарыі прынялі падчас урачыстай св. Імшы ў катэдры а 12-й гадзіне. Літургію цэлебраваў ксёндз біскуп Аляксандр Кашкевіч. Прысутныя вернікі сталі сведкамі таго, як падчас удзялення паслугі лектарату Яго Эксцэленцыя ўручыў алюмнам Святое Пісанне і зрабіў іх адказнымі за абвяшчэнне Божага слова падчас св. Імшы, а таксама падчас удзялення паслугі акалітату ксёндз біскуп уручыў алюмнам патэны з хлебам, каб тыя маглі ўдзяляць св. Камунію падчас св. Імшы і несці яе ў іншыя месцы хворым і патрабуючым.
На пачатку св. Імшы была асвечана вада, якой ксёндз біскуп удзяляў бласлаўленне кандыдатам да новых паслуг, якіх перад гаміліяй прадставіў ксёндз рэктар Юзаф Станеўскі.
– Дарагія алюмны, велікапосныя рэкалекцыі былі для вас магчымасцю паўторнага асэнсавання глыбокіх і важных для нашага жыцця клопатаў, – сказаў падчас гаміліі ксёндз біскуп Аляксандр. – Паслугі лектарату і акалітату, якія вы прымеце праз некалькі хвілін, з’яўляюцца чарговым этапам на вашай дарозе да святарства, чарговым пацвярджэннем выбару, які кожны з вас зрабіў, калі адказаў “так” на голас Хрыста “Ідзі за Мной”. Я б хацеў, каб вы памяталі і ўзялі сабе да сэрца, што сённяшнія паслугі не з’яўляюцца толькі замыканнем чарговага этапу вашай фармацыі. Яны адкрываюць перад вамі новую дарогу – дарогу росту і сталення да рэалізацыі таго, што прынятая паслуга азначае. Вы павінны фарміраваць сябе так, каб быць падобнымі да Хрыста, якому ў будучыні прагнеце служыць як святары.
Ужо зараз, казаў ксёндз біскуп, будучыя святары павінны ўсвядоміць сабе вялікую адказнасць, якая будзе на іх ускладзена. Паўнату жыцця і радасці можа даць чалавеку толькі Той, які сказаў пра сябе: “Я ёсць дарога, праўда і жыццё”. Свет патрабуе праўды, хоча пачуць Добрую Навіну, якая дае радасць і моц, нясе супакой і вызваленне. Каб несці яе людзям, трэба найперш самому яе добра пазнаць, разважаць над ёю і жыць ёю штодня.
Затым наступіў час удзялення паслуг лектарату і акалітату навучэнцам духоўнай семінарыі.
– Прымі кнігу Святога Пісання і верна перадавай Божае слова, каб штораз мацней яно дзейнічала ў людскіх сэрцах, – гэтак звяртаўся ксёндз біскуп Аляксандр Кашкевіч да кожнага кандыдата падчас удзялення паслугі лектарату.
Перадаючы патэну з хлебам кожнаму кандыдату да паслугі акалітату ксёндз біскуп прамаўляў:
– Прымі пасудзіну з хлебам для спраўлення Эўхарыстыі і рабі так, каб мог годна служыць Касцёлу пры Панскім стале.
Пасля гэтай св. Імшы семінарысты ў паслузе лектарату атрымалі бласлаўленне ксяндза біскупа на публічнае чытанне Святога Пісання, а навучэнцы 4-га курса падчас удзялення паслугі акалітату атрымалі бласлаўленне дапамагаць святару падчас св. Імшы ўдзяляць вернікам святую Камунію. Наступны крок на дарозе да святарства – кандыдатура, калі алюмны публічна заяўляюць пра свой намер стаць святаром. Затым пасвячэнні ў дыяканы, а праз паўгода ці больш – прэзбітэрат, ці святарскае пасвячэнне.
