11 чэрвеня біскуп Гродзенскі Аляксандр Кашкевіч наведаў парафіяльную супольнасць св. Міхала Арханёла ў Поразаве (Ваўкавыскі дэканат).
На Эўхарыстыі іерарх удзяліў вернікам парафіі сакрамэнт канфірмацыі.
У святыні сабраліся шматлікія парафіяне і госці. Усіх іх прывітаў пробашч кс. Юрый Канапелька.
Біскуп Кашкевіч, звяртаючыся да тых, хто быў узбагачаны ў гэты дзень сямю дарамі Духа Святога ў канфірмацыі, заахвоціў іх быць трывалымі ў веры і адкрыцца на дзеянне Духа.
Пастыр Касцёла на Гродзеншчыне падкрэсліў, што без дапамогі Духа Святога чалавек няздольны споўніць сваё жыццёвае пакліканне. Таму, па словах біскупа, важна быць заўсёды адкрытым на дзеянне Духа, які суправаджае чалавека і дапамагае верна ісці за голасам Хрыста Пана.
У канцы Імшы канфірмаваныя выказалі ўдзячнасць біскупу, свайму душпастыру і сястры Антаніне з Кангрэгацыі Школьных Сясцёр Нотр-Дам, якая рыхтавала іх да прыняцця гэтага сакрамэнту.
Прэс-служба Гродзенскай дыяцэзіі
